Diljit Dosanjh : एका बाजूला बॉम्बस्फोटाच्या धमक्यांनी सुरक्षा यंत्रणांची झोप उडवली आहे, तर दुसऱ्या बाजूला पंजाबी गायक दिलजीत दोसांझने आपल्या खास बेधडक अंदाजात कॉन्सर्ट रद्द होणार असल्याच्या चर्चांना पूर्णविराम दिला आहे. ‘15 नोव्हेंबरला मी इंदूरला येणारच, सर्वप्रथम तिथले पोहे खाणार आणि मग एनर्जी घेऊन चक दे फट्टे!’ असे म्हणत दिलजीतने चाहत्यांना मोठा दिलासा दिला.

एवढेच नाही, तर या संपूर्ण प्रकरणावरून बातम्यांना मसाला लावणाऱ्या न्यूज चॅनेल्सनाही त्याने चांगलेच सुनावले आहे. त्यामुळे सध्या इंदूरमधील कॉन्सर्टपेक्षा दिलजीतच्या या वक्तव्याचीच अधिक चर्चा रंगली आहे. दिलजीत दोसांझच्या ‘ऑरा इंडिया टूर’मधील इंदूर येथील कार्यक्रमाला धमक्यांचे सावट निर्माण झाले आहे.

15 नोव्हेंबर रोजी इंदूरमधील C21 इस्टेट येथे हा कार्यक्रम होणार आहे. या पार्श्वभूमीवर शहरातील तीन खासगी शाळांना आणि इंदूरच्या महापौर कार्यालयाला बॉम्बस्फोटाच्या धमकीचे ई-मेल प्राप्त झाले होते. या ई-मेलमध्ये कॉन्सर्टशी संबंधित धमक्यांचाही उल्लेख होता.

धमकी मिळाल्यानंतर बॉम्बशोधक पथकाने संबंधित शाळांची तपासणी केली. मात्र, तेथे कोणतीही स्फोटक वस्तू आढळली नाही. प्राथमिक तपासात हे ई-मेल खोडसाळपणातून पाठवले असावेत, असा पोलिसांचा अंदाज होता. मात्र, या प्रकरणाचा सायबर तपास सुरू आहे.

दिलजीतने इन्स्टाग्राम लाइव्हवरून दिले उत्तर

या सगळ्या घडामोडींमुळे दिलजीतचा इंदूरमधील कार्यक्रम रद्द होणार असल्याच्या चर्चा सुरू झाल्या होत्या. अखेर दिलजीतने इन्स्टाग्राम लाइव्हवर येत या चर्चांना उत्तर दिले. तो म्हणाला, ‘15 नोव्हेंबरला आम्ही इंदूरला येत आहोत. अनेक बातम्या झळकल्या. अनेक चॅनेल्सनी मजा घेतली.

बातम्यांना मसाला लावून, चटकारे घेत बातम्या सांगितल्या. त्यामुळे मीही आता बातम्यांच्या मूडमध्ये आहे. मी 15 तारखेला इंदूरला येत आहे. सर्वप्रथम आम्ही येऊन पोहे खाणार. 101 टक्के! त्यानंतर एनर्जी घेऊन चक दे फट्टे! तुम्ही काळजी करू नका आणि कोणतीही बातमी ऐकण्याचीही गरज नाही.’ दिलजीतच्या या विधानामुळे त्याच्या चाहत्यांमध्ये उत्साहाचे वातावरण निर्माण झाले आहे.

‘लघुशंकेला गेले तरी बातमी बनवतात’; न्यूज चॅनेल्सवर संताप

दिलजीतने केवळ कॉन्सर्टबाबत स्पष्टीकरण दिले नाही, तर बातम्या दाखवण्याच्या पद्धतीवरही जोरदार टीका केली. तो म्हणाला, ‘ज्या व्यक्तीला आरामाचं आयुष्य जगायचं आहे, बेफिकीरपणे आणि टेन्शन फ्री राहायचं आहे, त्या व्यक्तीने बातम्या ऐकू नयेत. सकाळी गुगलवर जगभरातील बातम्या पाहा. नाहीतर हे लोक मसाला लावून, कोणी लघुशंकेला गेले तरी त्याची बातमी बनवतात.’

काय आहे दिलजीतचा ऑरा इंडिया टूर?

दिलजीत दोसांझच्या ऑरा इंडिया टूरची सुरुवात 30 ऑक्टोबर रोजी दिल्लीतील जवाहरलाल नेहरू स्टेडियम येथे झालेल्या कार्यक्रमाने झाली. या दौऱ्यात देशातील विविध शहरांमध्ये त्याचे संगीत कार्यक्रम आयोजित करण्यात आले आहेत.

इंदूरमध्ये 15 नोव्हेंबर रोजी C21 इस्टेट येथे कार्यक्रम होणार आहे. त्यानंतर 21 नोव्हेंबरला अहमदाबादमधील नरेंद्र मोदी स्टेडियम, 27 नोव्हेंबरला मुंबईतील महालक्ष्मी रेसकोर्स, 29 नोव्हेंबरला बंगळुरूमधील NICE ग्राउंड्स आणि 5 डिसेंबरला लखनऊमधील जंबूरी ग्राउंड येथे तो परफॉर्म करणार आहे. चंदीगडमध्ये 12 डिसेंबरला न्यू पीसीए स्टेडियम, मुल्लानपूर येथेही कार्यक्रम नियोजित आहे.