Ram Mandir Donation : अयोध्येतील श्रीराम मंदिराच्या दानपेटी आणि देणगी निधीच्या कथित अपहाराच्या मुद्द्यावरून शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनी भारतीय जनता पक्षावर जोरदार हल्लाबोल केला आहे.

राम मंदिराच्या पवित्र निधीवर भाजपने दरोडा टाकल्याचा थेट आरोप करत, उद्धव ठाकरे यांनी या लुटीचा जाब विचारण्यासाठी येत्या रविवारी (५ जुलै) दादर येथील हनुमान मंदिराजवळ भव्य रामरक्षा आंदोलन करण्याची घोषणा मुंबईतील पत्रकार परिषदेत केली.

पत्रकार परिषदेत आक्रमक भूमिका मांडताना उद्धव ठाकरे म्हणाले, देशातील दोन खासदारांचा पक्ष असलेल्या भाजपने हिंदुत्वाचे आणि राम मंदिराचे भांडवल करून सत्ता मिळवली.

कारसेवकांचे बलिदान आणि हिंदूंच्या संघर्षातून उभे राहिलेले राम मंदिर आज भाजपच्या काळात वेगळ्याच भ्रष्ट कारणांमुळे चर्चेत आले आहे, हे देशाचे दुर्दैव आहे.

आमदार खरेदी-विक्री करण्यासाठी आणि ऑपरेशन करून राजकीय पक्ष फोडण्यासाठी राम मंदिराच्या चोरीचा पैसा वापरला जातोय का? असा गंभीर संशय निर्माण झाला आहे, अशी आक्रमक भूमिका ठाकरेंनी मांडली.

रविवारपासून आंदोलनाचे रणशिंग

उद्धव ठाकरे यांनी सर्व रामभक्तांना पक्षभेद विसरून ५ जुलै रोजी दादरच्या हनुमान मंदिरात एकत्र येण्याचे आवाहन केले आहे. आम्ही तिथे एकत्र येऊन रामरक्षा, हनुमान स्तोत्र आणि हनुमान चालीसा पठण करणार आहोत.

या आंदोलनाची सुरुवात दादरमधून होईल आणि त्यानंतर राज्यभरातील प्रत्येक जिल्हा, शहर आणि खेड्यापाड्यातील राम व हनुमान मंदिरांमध्ये हे आंदोलन पसरवले जाईल, असे ठाकरेंनी स्पष्ट केले.

आषाढी वारीच्या पार्श्वभूमीवर वारकरी आणि रामावर श्रद्धा असणारा प्रत्येक हिंदू या लुटीविरोधात भाजपला उत्तरदायित्व स्वीकारायला लावल्याशिवाय राहणार नाही, असा इशाराही त्यांनी दिला.

अब हिंदू मार नही खायेगा, तसे मी म्हणतोय की, मंदिर लुटारूंना अब हिंदू माफ नहीं करेगा. जे जे मंदिर लुटत आहेत त्यांना हिंदू त्यांची जागा दाखवल्याशिवाय राहणार नाही.

– उद्धव ठाकरे, पक्षप्रमुख, शिवसेना (उद्धव बाळासाहेब ठाकरे)