प्रभात वृत्तसेवा सातारा – सातारा शहराचा प्रथम नागरिक कोण, या प्रतिष्ठेच्या प्रश्नासाठी भाजपला महाविकास आघाडीने जोरदार टक्कर देण्याची रणनीती स्पष्ट केली आहे. भाजपचे नगराध्यक्ष पदाचे उमेदवार अमोल मोहिते यांच्या नेतृत्वाला महाविकास आघाडीच्या माध्यमातून सुवर्णाताई पाटील यांचे जोरदार आव्हान मिळाले आहे. सातारा जिल्ह्यातील राजकीयदृष्ट्या महत्त्वाच्या असणार्या सातारा पालिकेच्या रणसंग्रामात कोण बाजी मारणार, हा राजकीय वर्तुळातील चर्चेचा विषय आहे. यंदा नगराध्यक्ष पदाच्या रेसमध्ये दोन दिग्गजांसह तब्बल 12 उमेदवार रिंगणात आहेत.नवागतांचा राजकीय स्पर्धेच्या शह-काटशह च्या राजकारणात किती निभाव लागेल, हे सांगता येणार नसले तरी काही चेहरे हे सातारकरांच्या हितासाठी रणांगणात उतरण्याचा दावा करत आहेत. शिक्षक परिषदेचे कार्यवाह माजी सेवानिवृत्त पर्यवेक्षक सुधीर विसापुरे यांची उमेदवारी सुद्धा चर्चेचा विषय ठरली आहे. समाजाला रचनात्मक दिशा देणारा शिक्षकच समाज घडवतो. सातारा पुन्हा नव्याने घडवण्यासाठी माझा नगराध्यक्ष पदासाठी अर्ज आहे, असा त्यांचा दावा आहे.भाजपची संपूर्ण ताकद अमोल मोहिते यांच्या पाठीमागे उभी राहणार आहे. मनोमिलनात नगराध्यक्षपदाच्या उमेदवारीवरून वादाची कितीही भांडी वाजली तरी भाजप म्हणून सर्व नगरसेवकांना तसेच भाजपच्या प्रचार यंत्रणेला ही लढत प्रतिष्ठेची करून अमोल मोहितेच नगराध्यक्ष होतील यासाठी पायाला भिंगरी लावावी लागणार आहे. अमोल मोहिते यांच्या घरटी गाठीभेटी, संपर्क यंत्रणा गतिमान झाली आहे. सातार्यात दोन्ही महाराजांचे असणारे राजकीय वलय, सातारा विकास आघाडी व नगर विकास आघाडी यांची स्वतंत्र संपर्क यंत्रणा, सातारा शहराच्या राजकारणावर असणारा राजेशाहीचा प्रभाव, तसेच स्वतः अमोल मोहिते हे राजघराण्याशी परंपरेने संबंधित असल्याने अनेक दृष्टीने तसेच राजकीयदृष्ट्या त्यांचे पारडे जड मानले जात आहे. दुसरीकडे महाविकास आघाडीच्या उमेदवार सुवर्णाताई पाटील यांनी निष्ठावंतांना डावल्याची भावना तीव्र करत महाविकास आघाडीचा रस्ता पकडला. सक्षम असूनही उमेदवारांना नाकारले जाणे हे अत्यंत त्रासदायक होते. त्यामुळेच आपली सातार्याच्या भविष्यासाठी उमेदवारी असल्याचे त्यांनी स्पष्ट केले आहे. सातारा पालिकेला टक्केवारीच्या राजकारणापासून दूर ठेवणे, शहरामध्ये महिलांसाठी सुरक्षित वातावरण, शहराला पर्यटनाचा केंद्रबिंदू बनवणे, शहरातील पार्किंग व अतिक्रमणांवर कायमस्वरूपी तोडगा, समाजकारण व राजकारणातील गुन्हेगारीला प्रशासनाच्या सहकार्याने पायबंद घालणे या मुद्द्यांवर सुवर्णाताई पाटील यांचा प्रचार सुरू झाला आहे. सुवर्णाताई पाटील यांचे पती शिवसेना माजी जिल्हाप्रमुख नरेंद्र पाटील यांचे सुद्धा सातार्यात मोठे राजकीय वलय आहे. जिल्ह्याच्या तसेच शहराच्या राजकारणाची खडानखडा माहिती असणारे नरेंद्र दादा राजकीयदृष्ट्या दोन हात करायला नेहमीच सक्षम असतात. सुवर्णाताई यांच्या ज्योर्तिमय फाउंडेशनचा सातार्याच्या सामाजिक व महिला विश्वामध्ये मोठा बोलबाला आहे. त्या माध्यमातून घरटी जोडले गेलेले मोठे महिला संघटन हा सुवर्णाताईंचा प्लस पॉइंट आहे.
