BJP News : गुजरातच्या विसनगर शहरातून एक अत्यंत धक्कादायक आणि मन सुन्न करणारी घटना समोर आली आहे. भारतीय जनता पक्षाचे (BJP News) सक्रिय नेते आणि विसनगर नगरपालिकेतील भाजपचे पक्षनेते दीपकभाई मोदी (वय ५४ वर्षे) यांनी आज पहाटे रेल्वेखाली उडी मारून आपली जीवनयात्रा संपवली. या दुर्दैवी घटनेची बातमी वाऱ्यासारखी पसरताच स्थानिक नागरिकांसह भाजप परिवार आणि राजकीय वर्तुळात प्रचंड खळबळ उडाली आहे.

भीषण अपघात आणि घटनास्थळाचे दृश्य

प्राथमिक माहितीनुसार, दीपकभाई मोदी हे विसनगरमधील कंसा NA भागातील गणेश नगर सोसायटीत राहत होते. आज पहाटेच्या सुमारास त्यांनी (BJP News) पतनी दरवाजा ते मोटल हॉटेल रस्त्यावरील स्मशानभूमीजवळ असलेल्या नाल्याजवळ वरेथा-गांधीनगर पॅसेंजर ट्रेनखाली उडी घेतली. हा अपघात इतका भीषण होता की, ट्रेनखाली आल्यामुळे त्यांच्या शरीराचे दोन तुकडे झाले आणि त्यांचा जागीच मृत्यू झाला.

पक्षनिष्ठ आणि दानशूर व्यक्तिमत्त्व (BJP News)

दीपकभाई मोदी हे विसनगरमधील भाजपचा एक मजबूत आणि सक्रिय चेहरा होते. नुकत्याच पार पडलेल्या विसनगर नगरपालिकेच्या निवडणुकीत ते प्रभाग क्रमांक १ मधून बिनविरोध निवडून आले होते.

त्यांची मजबूत संघटनात्मक पकड, कामाचा धडाका आणि पक्षाप्रती असलेली निष्ठा लक्षात घेऊन पक्षश्रेष्ठींनी त्यांच्यावर पालिकेत भाजप पक्षनेतेपदाची मोठी जबाबदारी सोपवली होती. ते राष्ट्रीय स्वयंसेवक संघाचे (RSS) सदस्य होते, तसेच आपल्या दानशूर आणि मदतगार स्वभावामुळे ते शहरात अत्यंत लोकप्रिय होते.

मोदी कुटुंबावर दुःखाचा डोंगर

दीपकभाई यांच्या अकाली जाण्याने त्यांच्या कुटुंबावर दुःखाचा डोंगर कोसळला आहे. त्यांच्या पश्चात पत्नी, एक मुलगी आणि दोन मुले असा मोठा परिवार आहे. त्यांच्या पत्नीनेही यापूर्वी कंसा पंचायत समितीमध्ये सदस्य म्हणून काम केले आहे. कुटुंबातील मुख्य व्यक्तीने असे टोकाचे पाऊल उचलल्यामुळे संपूर्ण परिसरात हळहळ व्यक्त होत आहे.

राजकीय नेत्यांची रुग्णालयात गर्दी; पोलिसांकडून तपास सुरू

घटनेची माहिती मिळताच स्थानिक नागरिकांनी आणि नातेवाइकांनी घटनास्थळावर मोठी गर्दी केली होती. घटनेची गांभीर्य ओळखून पोलिसांनी तातडीने घटनास्थळ गाठून पंचनामा केला आणि मृतदेह शवविच्छेदनासाठी विसनगर सिव्हिल हॉस्पिटलमध्ये पाठवला.

दीपकभाई यांच्या निधनाची बातमी समजताच विसनगर शहर भाजप अध्यक्ष, जिल्हा भाजप अध्यक्ष, नगरसेवक आणि मोठ्या संख्येने पक्षाचे पदाधिकारी व कार्यकर्ते यांनी सिव्हिल हॉस्पिटलमध्ये धाव घेतली.

दरम्यान, अत्यंत मनमिळाऊ आणि यशस्वी नेतृत्व लाभलेल्या दीपकभाई यांनी आत्महत्येसारखे टोकाचे पाऊल का उचलले, याचे कारण (BJP News) अद्याप अस्पष्ट आहे. पोलीस या प्रकरणाचा सर्व बाजूंनी सखोल तपास करत आहेत.