Abdul Sattar : औरंगाबाद जिल्हा मध्यवर्ती सहकारी बँकेच्या (ADCC) निवडणुकीत शिवसेना आमदार अब्दुल सत्तार यांना मोठा राजकीय धक्का बसला आहे. त्यांचे पुत्र समीर सत्तार यांचा उमेदवारी अर्ज निवडणूक निर्णय अधिकाऱ्यांनी बाद ठरवल्याने जिल्ह्याच्या राजकारणात खळबळ उडाली आहे.

विधान परिषद निवडणुकीतून माघार घेतल्यानंतर अब्दुल सत्तार यांनी जिल्हा बँकेवरील सत्ता कायम राखण्यावर पूर्ण लक्ष केंद्रित केले होते. यासाठी महायुतीतील भाजप आणि शिवसेना यांच्यातील मतभेद मिटवण्याचे प्रयत्न मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या स्तरावरही झाल्याची चर्चा होती. मात्र, या घडामोडींना वेगळे वळण लागले असून समीर सत्तार यांचाच अर्ज बाद झाला आहे.

यापूर्वी विधान परिषद निवडणुकीत भाजपचे अधिकृत उमेदवार सुहास शिरसाट यांच्या विरोधात समीर सत्तार यांनी उमेदवारी अर्ज दाखल केला होता. नंतर तो अर्ज मागे घेण्यात आला. त्यानंतर जिल्हा बँकेच्या संचालक मंडळाच्या निवडणुकीसाठी त्यांनी पुन्हा अर्ज भरला होता. मात्र सुरुवातीपासूनच त्यांच्या उमेदवारीवर आक्षेप घेण्यात आले होते.

हेही वाचा : TMC MP Kirti Azad: “पळपुटे, गद्दार, तुम्हाला जायचे असेल तर जा, पण…” ; कल्याण बॅनर्जी अन् कीर्ती आझाद यांचा बंडखोर खासदारांवर हल्लाबोल

समीर सत्तार यांच्यासह पालकमंत्री संजय शिरसाट, त्यांची कन्या हर्षदा शिरसाट, वैजापूरचे आमदार रमेश बोरणारे आणि कन्नडच्या संजना जाधव यांच्या अर्जांवरही विविध उमेदवारांकडून आक्षेप नोंदवण्यात आले होते. या आक्षेपांवर सुनावणी सुरू असताना संपूर्ण जिल्ह्याचे लक्ष या निर्णयाकडे लागले होते. अखेर निवडणूक निर्णय अधिकाऱ्यांनी अर्ज बाद केल्याचा मोठा निर्णय दिला. या निर्णयामुळे अब्दुल सत्तार प्रचंड संतापले असल्याची माहिती समोर आली आहे.

अर्ज का बाद करण्यात आला?  (Abdul Sattar)

सिल्लोड येथील सिद्धेश्वर सहकारी साखर कारखान्याचे संचालक काकासाहेब फरकाडे यांनी समीर सत्तार यांच्या उमेदवारीवर आक्षेप घेतला होता. समीर सत्तार यांनी ज्या सहकारी संस्थेच्या माध्यमातून अर्ज दाखल केला होता, ती संस्था थकबाकीदार असल्याचा मुद्दा उपस्थित करण्यात आला. तसेच जिल्हा बँकेची शाखा त्यांच्या मालकीच्या इमारतीत स्थलांतरित झाल्यामुळे त्यांनी वैयक्तिक लाभ घेतल्याचा आरोपही करण्यात आला.  (Abdul Sattar)

निवडणूक निर्णय अधिकाऱ्यांनी हे आक्षेप ग्राह्य धरत समीर सत्तार यांचा उमेदवारी अर्ज बाद केला. या निर्णयामुळे अब्दुल सत्तार यांची जिल्हा बँकेतील राजकीय समीकरणे बिघडण्याची शक्यता निर्माण झाली आहे. आता या घडामोडीनंतर सत्तार पुढे कोणती राजकीय भूमिका घेतात, याकडे जिल्ह्याचे लक्ष लागले आहे.

हेही वाचा : Parenting Tips: पालकांनो, मुलांना फक्त अभ्यास नाही तर ‘या’ गोष्टीही शिकवा