नवी दिल्ली :  भोपाळ मतदार संघातील भाजपाच्या खासदार साध्वी प्रज्ञा सिंह या नेहमीच आपल्या वादग्रस्त वक्तव्याने चर्चेत येतात. यावेळी पुन्हा एकदा   त्यांच्या एका कृतीमुळे त्या विरोधकांच्या निशाणावर आल्या आहेत. भोपाळच्या शक्तीनगर स्पोर्ट्स ग्राऊंडमध्ये साध्वी प्रज्ञा यांचा क्रिकेट खेळतानाचा एक व्हिडिओ व्हायरल होत आहे. यात साध्वी प्रज्ञा यांनी ‘जय श्रीराम’ आणि ‘वंदे मातरम’च्या घोषणा देत जोरदार फलंदाजी करताना दिसत आहेत.

साध्वी प्रज्ञा यांच्या याच क्रिकेट खेळण्यावर काँग्रेस नेत्यांनी निशाणा साधला आहे.साध्वी प्रज्ञा सहसा व्हीलचेअरवर दिसून येतात. पण यावेळी थेट क्रिकेटच्या मैदानात फलंदाजी करताना पाहायला मिळाल्यानं विरोधकांनी शंका उपस्थित केल्या आहेत.

व्हील चेयर पर ज़्यादातर समय नज़र आने वाली , बीमारी के कारण न्यायालय से राहत पाने वाली साध्वी जी जब क्रिकेट खेलते , फ़ुट्बॉल खेलते , समारोह में नृत्य करते दिखती है तो ख़ुशी होती है और ऐसा लगता है कि यह कोई आठवाँ अजूबा है , इस चमत्कार पर तो विश्व के डॉक्टरो को शोध करना चाहिये… pic.twitter.com/rUpPDaxi2g

— Narendra Saluja (@NarendraSaluja) December 25, 2021

काँग्रेस नेते नरेंद्र सलुजा यांनी साध्वी प्रज्ञा यांचा क्रिकेट खेळतानाचा व्हिडिओ ट्विट केला आहे. “व्हीलचेअरवर दिसणाऱ्या साध्वी प्रज्ञा आपल्या आजारपणाचं कारण देऊन न्यायालयात हजर राहत नाहीत. पण जेव्हा क्रिकेट, फुटबॉल, वॉलीबॉल किंवा समारंभात नृत्य करताना पाहायला मिळतात तेव्हा खूप आनंद होतो. असं वाटतं की हे तर आठवं आश्चर्य आहे. या चमत्काराचा जागतिक डॉक्टरांनी शोध घेतला पाहिजे”, असे ट्विट करत नरेंद्र सलुजा यांनी साध्वी प्रज्ञा सिंह यांना टोला लगावला आहे.

साध्वी प्रज्ञा यांनी एका क्रिकेट ग्राऊंडवरील स्पर्धेच्या उदघाटन कार्यक्रमात क्रिकेट खेळण्याचा आनंद लुटला. याचाच व्हिडिओ सोशल मीडियावर व्हायरल होत आहे. याआधी त्या बास्केटबॉल आणि वॉलीबॉल खेळत असतानाचाही व्हिडिओ व्हायरल झाला होता. त्यासोबतच एका निवडणूक प्रचारावेळी त्या सिंधी समाजाच्या कार्यक्रमात भजनात नृत्यू करतानाही पाहायला मिळाल्या होत्या.