Birthday Special : लंडनमध्ये ९ सप्टेंबर १९७५ रोजी जन्मलेले राज कुंद्रा हे आज बॉलिवूड वर्तुळात तसेच बिझनेस वर्ल्डमध्ये चर्चेत असलेले नाव आहे. वडील बलकृष्ण कुंद्रा मूळचे पंजाबच्या लुधियान्याचे. लंडनमध्ये स्थायिक झाल्यावर त्यांनी बस कंडक्टरची नोकरी केली. आई उषा राणी कुंद्रा एका दुकानात काम करत असत. अशा सामान्य कुटुंबात लहानाचा मोठा झालेल्या राज यांचा प्रवास अगदी साध्या गोष्टीपासून सुरू झाला. शालेय शिक्षणात मन न लागल्याने १८ व्या वर्षी त्यांनी शिक्षण सोडलं. यानंतर ते दुबईला गेले आणि तिथे छोट्या-मोठ्या बिझनेस आयडियावर काम करू लागले. याच काळात ते नेपाळला गेले आणि तिथून पश्मीना शाली घेऊन लंडनमध्ये विक्री केली. हा प्रयोग प्रचंड यशस्वी ठरला आणि त्यानंतर राज कुंद्रांनी मागे वळून पाहिलं नाही. सन २००७ मध्ये त्यांनी दुबईत ‘एसेंशियल जनरल ट्रेडिंग एलएलसी’ ही कंपनी सुरू केली. सोनं-चांदीसारख्या मौल्यवान धातूंमध्ये, बांधकाम, खाणकाम आणि ऊर्जा प्रकल्पांमध्ये त्यांनी गुंतवणूक केली. पुढे त्यांनी फॅशन, रिअल इस्टेट, मीडिया, होम शॉपिंग चॅनल आणि बॉलिवूड फिल्म फायनान्सिंगमध्ये पाऊल टाकलं. अभिनेता अक्षय कुमारसोबत मिळून त्यांनी बेस्ट डील टीव्ही हे होम शॉपिंग नेटवर्क सुरू केलं. २००९ मध्ये पत्नी अभिनेत्री शिल्पा शेट्टीसोबत त्यांनी राजस्थान रॉयल्स या आयपीएल संघात गुंतवणूक केली. मात्र स्पॉट फिक्सिंग वादामुळे त्यांचं नाव चर्चेत आलं आणि नंतर त्यांना क्रिकेटशी संबंधित सर्व कामांपासून आजीवन बंदी घालण्यात आली. राज कुंद्रांचे वैयक्तिक आयुष्यही नेहमी चर्चेत राहिले. पहिलं लग्न कविता कुंद्राशी झालं, पण ते न टिकता २००६ मध्ये घटस्फोट झाला. २००९ मध्ये त्यांनी शिल्पा शेट्टीशी विवाह केला. त्यांना दोन अपत्यं आहेत. मुलगा वियान आणि सरोगेसीद्वारे जन्मलेली मुलगी समीशा. मात्र २०२१ मध्ये त्यांच्यावर अश्लील सामग्री बनवण्याचे आरोप झाले आणि त्यांना अटकही झाली. काही आठवड्यांनी जामिनावर सुटका झाली, पण या घटनेमुळे त्यांच्या प्रतिमेला मोठा धक्का बसला. तरीदेखील राज समाजसेवेतही सक्रिय राहिले. २०१९ मध्ये स्वच्छ भारत अभियानासाठी योगदान दिल्याबद्दल त्यांना माजी राष्ट्रपती प्रणब मुखर्जी यांच्या हस्ते चॅम्पियन्स ऑफ चेंज पुरस्काराने गौरवण्यात आले. व्यवसाय, वाद आणि समाजकारण यांच्यामध्ये आता ते अभिनयातही नशीब आजमावत आहेत. नुकतीच त्यांची पंजाबी फिल्म ‘मेहर’ प्रदर्शित झाली असून, त्याच्या पहिल्या दिवसाचे उत्पन्न त्यांनी पूरग्रस्तांना दिले. २०२३ मध्ये त्यांनी तुरुंगातील अनुभवांवर आधारित यूटी६९ या चित्रपटात मुख्य भूमिका केली होती. साध्या कुटुंबातून सुरुवात करून, शाली विकणारा तरुण ते करोडोच्या साम्राज्याचा मालक हा राज कुंद्रांचा प्रवास खरोखरच प्रेरणादायी ठरतो.
