नवी दिल्ली : बिल गेट्‌स यांनी मायक्रोसॉफ्टच्या संचालक मंडळाचा राजीनामा दिल्याची माहिती कंपनीकडून देण्यात आली आहे. त्यांना सामाजकार्यात स्वत:ला झोकून द्यायचे असल्याने त्यांनी राजीनामा दिल्याचे सांगण्यात आले. बिल गेट्‌स यांना जागतिक आरोग्य आणि शिक्षण या क्षेत्रात काम करायचे आहे, त्यामुळेच ते सर्व जबाबदाऱ्यांमधून मुक्त झाले आहेत. परंतु ते मायक्रोसॉफ्टचे मुख्य कार्यकारी अधिकारी सत्या नडेला यांच्यासोबत तांत्रिक सल्लागार म्हणून कार्यरत राहणार आहेत.

मायक्रोसॉफ्टचे सह-संस्थापक आणि तांत्रिक सल्लागार बिल गेट्‌स यांना आपला सर्वाधिक वेळ शिक्षण, आरोग्य आणि जागतिक विकासाला चालना देण्यासाठी द्यायचा आहे, यासाठीच ते कंपनीच्या संचालक मंडळाचा राजीनामा देत आहेत,अशी माहिती मायक्रोसॉफ्टकडून देण्यात आली. 1975 मध्ये पॉल अलेन यांच्यासोबत त्यांनी मायक्रोसॉफ्टची स्थापना केली होती. 2000 पर्यंत त्यांनी कंपनीच्या मुख्य कार्यकारी अधिकारीपदाची जबाबदारी पार पाडली होती.

बिल गेट्‌स यांच्या राजीनाम्यानंतर कंपनीच्या संचालक मंडळातील सदस्यांची संख्या 12 झाली आहे. यामध्ये कंपनीचे मुख्य कार्यकारी अधिकारी सत्या नडेला यांचाही समावेश आहे. बिल गेट्‌स यांच्यासोबत काम करण्याची संधी मिळणे ही अभिमानास्पद बाब असल्याचे सत्या नडेला म्हणाले. त्यांचे ध्येय पूर्ण करण्याच्या दृष्टीने कंपनी काम करत राहिल, असेही त्यांनी स्पष्ट केले. संचालक मंडळाच्या सदस्यांना बिल गेट्‌स यांचे मार्गदर्शन मिळाले आहे. त्यांच्याकडून मिळालेल्या सल्ल्यांचाही भविष्यात कंपनीसाठी मोठा फायदा होईल आणि यापुढेही त्यांचा सल्ला कंपनीला मिळेल. मी त्यांच्यासोबत सामाजिक कार्यातही हातभार लावू इच्छितो, असेही त्यांनी स्पष्ट केले.