सलमान खानच्या घराबाहेर गोळीबार प्रकरणात मोठे यश, राजस्थानमधून पाचवा आरोपीस ‘अटक’
Bollywood News । बॉलीवूड अभिनेता सलमान खानच्या वांद्रे येथील निवासस्थानी झालेल्या गोळीबार प्रकरणात मुंबई गुन्हे शाखेने मंगळवारी पाचव्या आरोपीस अटक केली. या प्रकरणातील पाचव्या आरोपीला पोलिसांनी राजस्थानमधून अटक केली असून मोहम्मद चौधरी असे त्याचे नाव आहे.
मोहम्मद चौधरी नावाच्या आरोपीने सागर पाल आणि विक्की गुप्ता या दोन शूटरना पैसे पुरवून आणि रेकी करून मदत केली. चौधरीला आज मुंबईत आणण्यात येत असून त्याला न्यायालयात हजर केले जाणार आहे. कोठडीची मागणी करण्यात येणार असल्याचे मुंबई गुन्हे शाखेने सांगितले.
मुंबईतील वांद्रे परिसरात झालेल्या गोळीबाराच्या घटनेचा तपास सुरू असताना चौधरीला अटक करण्यात आली आहे. या अटकेमुळे सलमान खानच्या निवासस्थानावरील हल्ल्याशी संबंधित व्यक्तींशी आणखी एक दुवा जोडला गेला आहे.
पोलिसांनी आतापर्यंत पाच आरोपींना अटक केली आहे
14 एप्रिल रोजी मुंबईतील वांद्रे भागात दोन दुचाकीस्वारांनी सलमान खानच्या घराबाहेर गोळीबार केला होता. गोळीबाराच्या घटनेप्रकरणी शूटर सागर पाल आणि विकी गुप्ता यांच्यासह चार जणांना यापूर्वी अटक करण्यात आली होती. पोलिसांनी दिलेल्या माहितीनुसार, गँगस्टर लॉरेन्स बिश्नोई आणि त्याचा भाऊ अनमोल बिश्नोई यांनाही वॉन्टेड आरोपी म्हणून दाखवण्यात आले आहे.
अटक करण्यात आलेल्या आरोपींपैकी अनुज थापन याचा मुंबई पोलीस कोठडीत मृत्यू झाला. पंजाब आणि हरियाणामध्ये अनुज आणि सोनूवर अनेक गुन्हे दाखल असून ते सुरुवातीपासूनच लॉरेन्स गँगशी संबंधित आहेत. या दोघांनी 15 मार्च रोजी पनवेलमध्ये दोन पिस्तुलांची डिलिव्हरी केली होती. या दोघांनी सागर पाल आणि विकी गुप्ता यांना दोन पिस्तूल आणि 38 जिवंत काडतुसे दिली. सागर पाल आणि विकी गुप्ता या दोघांनी सलमानच्या घरावर गोळीबार केला. घटनेच्या दुसऱ्या दिवशी म्हणजेच १५ एप्रिलच्या रात्री दोघांना गुजरातमधील भुज येथून अटक करण्यात आली.
कोठडीत असताना थापनने आत्महत्येचा प्रयत्न केल्याचे मुंबई पोलिसांनी उघड केले आणि रुग्णालयात नेल्यानंतर त्याला मृत घोषित करण्यात आले. अनुज थापनच्या कुटुंबीयांनी मुंबई उच्च न्यायालयात धाव घेऊन त्याच्या मृत्यूची सीबीआय चौकशी करण्याची मागणी केली आहे. थापनने लॉकअपमध्येच आत्महत्या केल्याचा पोलिसांचा दावा आहे. त्याची आई रीता देवी यांनी शुक्रवारी हायकोर्टात दाखल केलेल्या याचिकेत त्याची हत्या करण्यात आल्याचे म्हटले आहे.
