Prashant Kishor : राष्ट्रवादी काँग्रेस पक्षाने आगामी निवडणुकांच्या पार्श्वभूमीवर मोठा राजकीय डाव टाकला असून, प्रसिद्ध निवडणूक रणनीतिकार प्रशांत किशोर यांची पक्षाच्या रणनीतीकारपदी नियुक्ती करण्याचा निर्णय घेतल्याची माहिती समोर आली आहे. सोमवारी 19 मे रोजी राष्ट्रवादी काँग्रेसच्या राष्ट्रीय अध्यक्ष सुनेत्रा पवार आणि खासदार पार्थ पवार यांच्यासोबत प्रशांत किशोर यांची महत्त्वपूर्ण बैठक पार पडली. या बैठकीत पक्षाच्या आगामी राजकीय रणनीतीबाबत चर्चा झाली असल्याची माहिती मिळत आहे. सूत्रांच्या माहितीनुसार, बैठकीनंतर कायदेशीर प्रक्रिया पूर्ण करण्याचे काम सुरू असून, पुढील दोन दिवसांत औपचारिकता पूर्ण होणार आहे. त्यानंतर 1 जूनपासून प्रशांत किशोर यांच्या टीमकडून राष्ट्रवादी काँग्रेससाठी अधिकृतपणे काम सुरू केले जाणार आहे. आगामी तीन वर्षे पक्षासाठी अत्यंत महत्त्वाची मानली जात असून, 2029 च्या निवडणुकांच्या दृष्टीने राष्ट्रवादीने आतापासूनच मोर्चेबांधणी सुरू केल्याचे बोलले जात आहे. (Prashant Kishor) Prashant Kishor प्रशांत किशोर कोण आहेत? (Prashant Kishor) प्रशांत किशोर हे देशातील आघाडीचे राजकीय रणनीतिकार मानले जातात. ‘पीके’ म्हणून प्रसिद्ध असलेल्या प्रशांत किशोर यांनी 2014 च्या लोकसभा निवडणुकीत नरेंद्र मोदी यांच्या प्रचार मोहिमेत महत्त्वाची भूमिका बजावत राष्ट्रीय पातळीवर ओळख निर्माण केली होती. त्यानंतर त्यांनी ममता बॅनर्जी, नितीश कुमार, वाय. एस. जगनमोहन रेड्डी, एम. के. स्टॅलिन आणि आम आदमी पक्षासाठीही यशस्वी निवडणूक रणनीती आखल्या आहेत. राजकारणात येण्यापूर्वी प्रशांत किशोर यांनी संयुक्त राष्ट्रसंघासोबत सार्वजनिक आरोग्य क्षेत्रात जवळपास आठ वर्षे काम केले होते. नंतर त्यांनी निवडणूक व्यवस्थापन आणि राजकीय ब्रँडिंग क्षेत्रात स्वतःची वेगळी ओळख निर्माण केली. नरेश अरोरांना डच्चू (Prashant Kishor) दरम्यान, यापूर्वी राष्ट्रवादी काँग्रेससाठी डिझाईन बॉक्स ही कंपनी निवडणूक प्रचार आणि इमेज बिल्डिंगचे काम पाहत होती. कंपनीचे प्रमुख नरेश अरोरा यांनी अजित पवार यांच्यासाठी ‘गुलाबी कॅम्पेन’ राबवले होते. लाडकी बहीण योजनेनंतर गुलाबी जॅकेटमधील अजित पवारांची प्रतिमा मोठ्या प्रमाणावर चर्चेत आली होती. विधानसभा निवडणुकीत पक्षाला मिळालेल्या यशात या मोहिमेचा मोठा वाटा मानला जातो. मात्र, अजित पवार यांच्या निधनानंतर डिझाईन बॉक्सने काम थांबवल्याचे सांगितले जात आहे. आता प्रशांत किशोर यांच्या एंट्रीनंतर राष्ट्रवादी काँग्रेसच्या राजकीय रणनीतीत मोठे बदल होण्याची शक्यता व्यक्त केली जात आहे. भेटींचा सिलसिला आणि चर्चांना उधाण गेल्या काही दिवसांपासून राष्ट्रवादी काँग्रेस पक्षात अंतर्गत वादाची चर्चा राजकीय वर्तुळात रंगत आहे. पक्षातील बडे नेते प्रफुल्ल पटेल आणि सुनील तटकरे यांना डावलले जात असल्याचे बोलले जात आहे. या नेत्यांना साईडलाईन करत पक्षाची आर्थिक सूत्रे जय पवार आणि पार्थ पवार यांच्या हाती देण्यात आले आहेत. त्यानंतर भेटींचा सिलसिला सुरू झाला असून, पार्थ पवार यांनी मुख्यमंत्री देवेंद्र फडणवीस यांची भेट घेतल्यानंतर राष्ट्रवादीमधील दोन बड्या नेत्यांनीही फडणवीसांची भेट घेतल्याने चर्चांना उधाण आले असून, राष्ट्रवादीत मोठी उलथापालथ होणार असल्याची कुजबुज सुरू झाली आहे. हेही वाचा : Nawazuddin Siddiqui Birthday: २५०० रुपयांत मुंबईत आलेला मुलगा आज बॉलिवूडचा दमदार अभिनेता; नवाजुद्दीन सिद्दीकींचा प्रेरणादायी प्रवास