Bihar Election : बिहार विधानसभा निवडणुकीच्या धामधुमीत काँग्रेस पक्षाला मोठा धक्का बसला आहे. महागठबंधनमधील तिकीट वाटपाच्या वादामुळे छपरा (सारण) जिल्ह्यातील काँग्रेसचे माजी जिल्हाध्यक्ष बच्चू प्रसाद बीरू यांनी पक्षाच्या पदाबाबत आणि प्राथमिक सदस्यत्वाचा राजीनामा दिला आहे. बीरू यांच्या या निर्णयाने काँग्रेसचा अंतर्गत कलह चव्हाट्यावर आणला असून, निवडणुकीच्या पार्श्वभूमीवर पक्षाच्या एकजुटीवर प्रश्नचिन्ह उपस्थित झाले आहे. बीरू हे राहुल गांधी यांच्या प्रभावामुळे पक्षात सामील झाले होते, मात्र सारण जिल्ह्यात वर्षानुवर्षे झालेल्या परिश्रमाला एकही तिकीट न मिळाल्याने हा निर्णय घेतल्याचे त्यांनी सांगितले. सारणमध्ये एकही तिकीट नाही पाटण्यात माध्यमांशी बोलताना बीरू म्हणाले, “मी राहुल गांधी यांच्या प्रेरणेने पक्षात सामील झालो. सारण जिल्ह्यात वर्षानुवर्षे मेहनत केली, तरी एकही जागा मिळाली नाही. येथील काँग्रेस RJD च्या नियंत्रणाखाली आहे.” हा राजीनामा महागठबंधनमधील तिकीट वाटपाच्या वादाचा परिणाम असल्याचे मानले जात आहे. काँग्रेसने नुकतीच ४८ उमेदवारांची पहिली यादी जाहीर केली. यामध्ये सारणसारख्या महत्त्वाच्या भागात काँग्रेसला अपेक्षेपेक्षा कमी जागा मिळाल्या. RJD ने छपरा येथून बॉलिवूड अभिनेता खेसारी लाल यादव यांना उमेदवारी दिली असून, ही जागा काँग्रेसकडून लढवली जाण्याची अपेक्षा होती. बीरू यांचा राजीनामा ऐन निवडणुकीच्या वेळी झाल्याने काँग्रेसला वैचारिक आणि संघटनात्मक धक्का बसला आहे. सारण जिल्हा हा लालू प्रसाद यादव यांचा बालेकिल्ला असून, येथे काँग्रेसची पकड कमकुवत झाल्याने पक्षाला मोठा फटका बसू शकतो. बीरू हे जिल्ह्यातील प्रभावी नेते म्हणून ओळखले जातात आणि त्यांच्या जाण्याने स्थानिक कार्यकर्त्यांमध्ये असंतोष वाढण्याची शक्यता आहे.
