Chhagan Bhujbal | Chandrakant Patil | Pune Drugs : शिक्षणाचे माहेरघर म्हणून ओळख असलेल्या पुण्यातून आणखी धक्कादायक प्रकार समोर आला आहे. एफसी रोडवरील एका हॉटेलमधील काही तरुणांचा व्हिडिओ व्हायरल होत आहे. ज्यात या पार्टीमध्ये काही तरुण चक्क बाथरूम मध्ये ड्रग्ज घेताना दिसून येत आहे.

या घटनेने आता पुण्यातील ड्रग्ज प्रकरण पुन्हा एकदा समोर आले आहे. यावरून आता राजकीय वर्तुळात आरोप-प्रत्यारोप केले जात आहेत. रवींद्र धंगेकर आणि सुषमा अंधारे यांनी राज्य उत्पादन शुल्क मंत्री शंभूराज देसाई यांच्यावर जोरदार हल्लाबोल केला.

दरम्यान, या प्रकरणी आता राष्ट्रवादी अजित पवार गटाचे मंत्री छगन भुजबळ आणि चंद्रकांत पाटील आमने-सामने आल्याचं चित्र दिसून येत आहे. माध्यमांशी बोलताना छगन भुजबळ म्हणाले की, ‘मी पालकमंत्री होतो, मी मुख्यमंत्री होतो, तेव्हा असे घडत नव्हते असे म्हणून कसे चालेल?

प्रत्येकाच्या कार्यकाळात गुन्हेगारी मोडीत काढण्याचे काम सुरू असते. काही गोष्टी उजेडात येतात, तेव्हा त्याला महत्व प्राप्त होतं. समोरच्या विरोधकांनी बोलले तर ठीक आहे. पण, बरोबरच्या लोकांनी बोललं तर कसे चालेल, असा टोला त्यांनी चंद्रकांत पाटलांना लगावला.

छगन भुजबळांच्या या वक्तव्यानंतर चंद्रकांत पाटील यांनी देखील आपली प्रतिक्रिया दिली आहे. ते म्हणाले, “मी पालकमंत्री असतानाही अशा प्रकारच्याच नाही तर सर्वजण चिंता करतील अशा घटना घडल्या नाहीत, असे वक्तव्य चंद्रकांत पाटील यांनी केले. त्यानंतर त्यांनी सारवासारव करण्याचा प्रयत्न केला.

अशा प्रकारच्या घटना घडल्या आहेत की नाही मला आता आठवत नाहीत. तुम्हालाही आठवत नसतील. पण घडल्याच नाही, असा दावा करत येत नाही ना? पुण्याची लोकसंख्या आधी 14 लाख होती. आता 70 लाख झाली.

पुण्यात मोठ्या प्रमाणात उद्योग, व्यवसाय, शिक्षण , रुग्णालये चांगली झाल्यामुळे गर्दी वाढत चालली आहे. त्यामुळे अशा प्रकारच्या घटना घडू नये, यासाठी पोलीस प्रशासनाने काळजी घेतली पाहिजे, असे चंद्रकांत पाटील यांनी म्हटले होते.

काय म्हणाल्या सुषमा अंधारे?

“पुण्यातील ड्रग्ज प्रकरणावर आम्ही तब्बल आठ ते नऊ महिन्यापासून सातत्याने भूमिका मांडत आहोत. जेव्हा कोट्यवधींचे ड्रग्जचे साठे सापडले होते. तेव्हाही आम्ही शंभुराजे देसाई आणि गृहमंत्र्यांना प्रश्न विचारले होते.

शंभूराज देसाई यांनी तात्काळ आपल्या मंत्रीपदाचा राजीनामा दिला पाहिजे. तसेच उत्पादन शुल्कचे अधिकारी राजपूत यांचेही निलंबन झाले पाहिजे. असे केल्याशिवाय पुणे सुधारणार नाही,” अशी भूमिका सुषमा अंधारे यांनी मांडली.

शंभुराज देसाई यांचे प्रत्युत्तर

“हा व्हिडिओ आताच पहिला असून याची चौकशी आम्ही करू. रवींद्र धंगेकर आणि सुषमा अंधारे यांनी जो प्रश्न उपस्थित केला आहे. गेल्या महिन्याभरात आपण पुण्यात ४९ हॉटेल आणि बारवर कारवाई केली आहे. तसेच पुण्यात सरप्राईज चेकिंग सुरु करण्यात आले आहे.

या प्रकारची गंभीर दखल घेऊन चौकशी करणार आहे. तेथील क्षेत्रीय अधिकाऱ्याचीही चौकशी करणार आहोत. कुठल्याही अधिकाऱ्याबरोबर सरकारचे साटेलोटे नसून जो अधिकारी यात दोषी आढळेल, त्यावर कारवाई केली जाईल,”असे आश्वासन शंभुराज देसाई यांनी दिले.

तर याप्रकरणावरून आमदार रवींद्र धंगेकर यांनी देखील शंभुराजे देसाई यांच्यावर गंभीर आरोप केले आहेत. यात पोलिसांची चूक आहे. अधिकारी याकडे दुर्लक्ष करतात. पैसे घेतल्यामुळे असे धंदे चालतात.

राजपूत नावाच्या अधिकाऱ्याला महिन्याला तीन कोटी रुपये मिळतात, ते मंत्र्यांना पोहचात. तो हप्ता शंभूराज देसाई यांना जातो, असा मोठा आरोप रवींद्र धंगेकर यांनी केला.