– सचिन इथापे
Bhuinj PHC – भुईंज प्राथमिक आरोग्य केंद्राच्या दुरवस्थेमुळे आरोग्य देणारे केंद्रच समस्यांच्या विळख्यात सापडल्याचे चित्र असून, इमारतीच्या सुरक्षेपासून औषधसाठा, आपत्कालीन सेवा, निधी, देखभाल आणि रुग्ण समितीच्या कार्यक्षमतेपर्यंत अनेक प्रश्न गंभीर बनले आहेत. परिसरातील नागरिकांना प्राथमिक उपचारांसाठी महत्त्वाचे ठरणाऱ्या या आरोग्य केंद्राची परिस्थिती सुधारण्यासाठी वेळोवेळी मागण्या होत असतानाही ठोस उपाययोजना होत नसल्याची भावना नागरिकांमध्ये आहे.

त्यामुळे प्रशासनाच्या कागदी कारभारात ग्रामीण आरोग्यसेवा अडकली आहे का,’ असा सवाल उपस्थित होत आहे. केंद्राच्या इमारतीच्या सुरक्षिततेबाबत स्ट्रक्चरल ऑडिट करण्यात आले. मात्र, ऑडिट नंतर संबंधित अहवालातील शिफारशींनुसार कोणती कार्यवाही करण्यात आली, दुरुस्ती आवश्यक असल्यास ती कधी होणार, नवीन इमारतीचा प्रस्ताव आहे का, याबाबत कोणतीच स्पष्टता नाही.

रुग्ण आणि त्यांच्या नातेवाइकांसह आरोग्य कर्मचाऱ्यांच्या सुरक्षिततेचा प्रश्न आहे. रुग्णांना चांगल्या सुविधा मिळाव्यात, स्थानिक समस्या सोडविण्यासाठी प्रशासनाशी समन्वय साधला जावा आणि आरोग्य केंद्राच्या कामकाजात पारदर्शकता राहवी, या उद्देशाने रुग्ण समितीची भूमिका महत्त्वाची आहे. मात्र, भुईंज प्राथमिक आरोग्य केंद्रातील रुग्ण समिती प्रत्यक्षात कितपत सक्रिय आहे, तिच्या बैठका किती वेळा होतात,

जबाबदारी कोणाची?
आरोग्य केंद्रातील समस्या केवळ स्थानिक पातळीवर सोडविणे शक्य नसल्याने तालुका आरोग्य अधिकारी, जिल्हा आरोग्य अधिकारी आणि जिल्हा परिषद प्रशासनाने या प्रश्नाकडे गांभीर्याने पाहणे आवश्यक आहे. कागदोपत्री अहवाल, बैठका आणि आश्‍वासनांपलीकडे जाऊन प्रत्यक्ष पाहणी, निधीची उपलब्धता आणि कालबद्ध कृती आराखडा तयार करण्याची गरज आहे.