प्रभात वृत्तसेवा विंझर – आस्कवडी (गोरड म्हसवली) ता. भोर येथील ग्रामदैवत आणि लाखो भाविकांचे श्रद्धास्थान असलेल्या काळूबाई देवीच्या २७ व्या वर्धापन दिनानिमित्त आस्कवडी (गोरड म्हसवली) गावात उत्साहाचे आणि भक्तीमय वातावरण निर्माण झाले आहे. यावर्षीचा वर्धापन दिन अधिक भक्तीपूर्ण आणि भव्यदिव्य पद्धतीने साजरा करण्यासाठी काळूबाई सेवा मंडळ आणि काळूबाई भाविक मंडळातर्फे जोरदार तयारी अंतिम टप्प्यात आहे. विविध धार्मिक आणि सांस्कृतिक कार्यक्रमांचे आयोजन करण्यात आले आहे. मंडळांनी गेल्या काही दिवसांपासून देवीच्या मंदिराची स्वच्छता, रंगरंगोटी आणि आकर्षक विद्युत रोषणाई करण्याचे काम हाती घेतले आहे. काळूबाई देवी सेवा मंडळ आणि भाविक मंडळाच्या कार्यकर्त्यांनी उत्सवात येणाऱ्या भाविकांसाठी सर्वतोपरी सुविधा उपलब्ध व्हाव्यात यासाठी विशेष नियोजन केले आहे. यामध्ये पिण्याचे पाणी, पार्किंग व्यवस्था आणि आरोग्य सुविधांचा समावेश आहे. वर्धापन दिनाच्या मुख्य दिवशी सकाळी देवीच्या मूर्तीला अभिषेक, महापूजा आणि महाआरतीचे आयोजन करण्यात आले आहे. दुपारनंतर भव्य महाप्रसादाचे (भंडारा)वाटप करण्यात येणार आहे, ज्यासाठी स्वयंसेवकांचे मोठे पथक कार्यरत आहे. काळूबाई सेवा मंडळ आणि काळूबाई भाविक मंडळाने परिसरातील सर्व भाविक, ग्रामस्थ आणि नागरिकांना या भव्य सोहळ्याचा लाभ घेण्याचे आवाहन केले आहे.
