Bhaskar Jadhav:  राज्यात सरसकट दुष्काळ जाहीर करायला हवा होता, अशी मागणी शिवसेना उद्धव बाळासाहेब ठाकरे पक्षाचे नेते भास्कर जाधव यांनी केली आहे. दुष्काळाच्या निकषांमध्ये कोकणावर अन्याय झाल्याचा आरोप करत, याबाबत मुख्यमंत्र्यांना यापूर्वीच पत्र दिल्याचंही जाधव यांनी सांगितलं.

कोकणातील प्रमुख पीक असलेलं भातपीक सध्या अडचणीत असल्याचा दावा भास्कर जाधव यांनी केला. पावसाअभावी जमिनीला भेगा पडल्या असून, शेतीसाठी पंपाने पाणी सोडण्याची वेळ आली आहे. पाणी दिल्यानंतरही शेती सुकून जात असल्याची परिस्थिती असल्याचं जाधव यांनी म्हटलं.

राज्य सरकारचा कोकणाकडे पाहण्याचा दृष्टिकोन चुकीचा असल्याची टीकाही त्यांनी केली. मागील अनुभव पाहता शेतकऱ्यांना मदत मिळवताना मोठ्या अडचणींचा सामना करावा लागू शकतो, अशी भीती त्यांनी व्यक्त केली.

मदत मिळवण्यासाठी आवश्यक कागदपत्रांची पूर्तता करताना शेतकऱ्यांच्या नाकी नऊ येतात, असा दावा जाधव यांनी केला. उद्धव ठाकरे मुख्यमंत्री असताना देण्यात आलेल्या मदतीसाठी अशा प्रकारच्या अटी नव्हत्या, असंही त्यांनी सांगितलं.

दरम्यान, कोकणातील कमी आणि अनियमित पावसामुळे भात आणि नाचणी पिकांच्या नुकसानीबाबत भास्कर जाधव यांनी मुख्यमंत्री देवेंद्र फडणवीस यांना पत्र दिल्याची नोंद अलीकडील वृत्तांतही आहे.