Bhaskar Jadhav : अयोध्येतील राम मंदिरातील देणगीच्या गैरव्यवहाराच्या मुद्द्यावरून ठाकरेसेनेचे आमदार भास्कर जाधव (Bhaskar Jadhav) यांनी भाजपवर जळजळीत टीका केली आहे. यापूर्वी पक्षप्रमुख उद्धव ठाकरेंनी देखील हिंदूत्त्ववादी संघटनांना राम मंदिरातील चोरीप्रकरणी रस्त्यावर उतरण्याचे आवाहन केले होते.

जाधव म्हणाले, कलियुगातले सगळ्यात लुटारू हे लोक आहेत. यांचा खरा चेहरा समोर आणायची संधी श्री रामांनी आपल्याला दिली आहे. त्यामुळे गावागावात जाऊन यांचे पाप लोकांना सांगणे गरजेचे आहे. पक्षीय बॅनर न घेता श्री रामाचा बॅनर आणि भगवा झेंडा घेऊन मतदार संघातील प्रत्येक भागात सभा घेणार असल्याची घोषणाच जाधव (Bhaskar Jadhav) यांनी केली आहे.

हे खरे हिंदुत्ववादी नाहीत, तर हे हिंदुत्वाचे मारेकरी आहेत. 2029 ला श्रीराम यांना तुडवल्याशिवाय राहणार नाही, असा घणाघात जाधव यांनी सत्ताधारी भाजपावर केला आहे. 1400 कोटी रुपयांची चोरी झाली आहे.

कोणी केली ही चोरी? ही चोरी दुसरा तिसरा कोणी केलेली नसून भाजपशी संबंधित असलेल्या संघटनांनीच केली आहे. हा विषय अजिबात सोडायचा नाही, देशात अनेकांनी उठाव करायला सुरुवात केली आहे, असेही जाधव (Bhaskar Jadhav) यांनी म्हटले.

नीट पेपरफुटीनंतर आता अयोध्येतील राम मंदिरातील गैरव्यवहाराच्या मुद्द्यावरुन विरोधकांनी सरकारला लक्ष्य केले आहे. ठाकरेसेना पक्षाचे प्रमुख उद्धव ठाकरे यांनी देखील रामरक्षा आंदोलनाची हाक देत केंद्रातील भाजप सरकारवर जोरदार हल्लाबोल केला. त्यानंतर, नागपुरातील संघभूमीतही या मुद्द्यावरुन आंदोलन करण्याची भूमिका ठाकरेसेनेने घेतली आहे.