Bhairavnath Temple Bawdhan – वाई तालुक्यातील बावधनचे ग्रामदैवत श्री काळभैरवनाथ देवस्थानाला पुण्यश्लोक अहिल्यादेवी होळकर ग्रामीण तीर्थक्षेत्र विकास योजनेअंतर्गत ‘ब’ वर्ग तीर्थक्षेत्राचा दर्जा मिळाला आहे. त्यामुळे देवस्थान परिसरातील पायाभूत सुविधांच्या विकासासाठी शासनाकडून निधी उपलब्ध होण्याचा मार्ग मोकळा झाला असून, बावधनच्या धार्मिक व पर्यटन विकासाला चालना मिळणार आहे. देवस्थानाला ‘ब’ वर्ग तीर्थक्षेत्राचा दर्जा मिळावा,

यासाठी माजी जिल्हा परिषद अध्यक्षा अरुणादेवी पिसाळ, कृषिभूषण शशिकांत पिसाळ, भाजपचे तालुकाध्यक्ष दीपक ननावरे, अ‍ॅड. दिप्ती पिसाळ आणि पंचायत समिती सदस्य सचिन भोसले यांनी पाठपुरावा केला. मागील वर्षी दीपक ननावरे यांच्या वाढदिवसानिमित्त आयोजित कार्यक्रमात ग्रामविकास मंत्री जयकुमार गोरे यांनी बावधनला ‘ब’ वर्ग तीर्थक्षेत्राचा दर्जा देण्याची घोषणा केली होती. यानंतर ग्रामपंचायत स्तरावर आवश्यक प्रस्ताव व कागदपत्रांची पूर्तता करण्यात आली.

सरपंच वंदना कांबळे, उपसरपंच उदयसिंह पिसाळ, विवेक भोसले, ग्रामपंचायत सदस्य आणि ग्रामपंचायत अधिकारी प्रशांत धुमाळ यांनी प्रशासकीय प्रक्रियेसाठी पाठपुरावा केला. मंत्रालयीन स्तरावर अ‍ॅड. दिप्ती पिसाळ यांनीही प्रयत्न केले. श्री काळभैरवनाथ देवस्थान प्रसिद्ध बगाड यात्रेसाठी ओळखले जाते. यात्रेसाठी महाराष्ट्रासह कर्नाटकातून मोठ्या संख्येने भाविक बावधनमध्ये येतात.

‘ब’ वर्ग दर्जामुळे देवस्थान परिसरात रस्ते, पिण्याचे पाणी, स्वच्छतागृहे, वाहनतळ, परिसर सुशोभीकरण, प्रकाश व्यवस्था तसेच भाविकांसाठी आवश्यक सुविधा उभारता येणार आहेत. यात्रेच्या काळातील गर्दीचे नियोजन आणि भाविकांना उपलब्ध होणार्‍या सुविधांमध्येही सुधारणा होण्याची अपेक्षा आहे. धार्मिक पर्यटनाला चालना मिळाल्यास स्थानिक दुकानदार, हॉटेल व्यावसायिक, वाहनचालक आणि अन्य व्यावसायिकांना रोजगाराच्या संधी उपलब्ध होण्याची शक्यता आहे.