Tukaram Mundhe : प्रशासकीय सेवेत काम करण्याअगोदर मोठ्या संघर्षावर मात करून यशाची ‘मशाल’ पेटवली जाते. अनेकांसाठी हा प्रवास अत्यंत खडतर असतो. सध्या अन्न व औषध प्रशासन विभागाच्या आयुक्तपदी असलेले डॅशिंग IAS अधिकारी तुकाराम मुंढे यांचाही प्रवास असाच राहिला आहे. सध्या त्यांच्या कारवाईचे किस्से चर्चेत असले तरी प्रशासकीय सेवेत रुजू होण्यापूर्वीच्या कठीण काळावर त्यांनी स्वतः प्रकाश टाकला. नुकतीच पुण्यातील बालगंधर्व रंगमंदिर येथे ‘Unstoppable Tukaram’ ही प्रकट मुलाखत पार पडली. या मुलाखतीमधून आयुष्यातील संघर्षांवर बोलताना विविध रंजक किस्से त्यांनी सांगितले.

‘पॅरासाईट’ म्हणून राहताना ढेकणांच्या त्रासामुळे अनेक रात्री त्यांना झोपही लागली नाही.

बी.ए. पूर्ण केल्यानंतर एम.ए. राज्यशास्त्राच्या प्रवेशासाठी ते प्रथमच ‘लालपरी’ एसटीने पुण्यात आले होते. शिवाजीनगर बसस्थानकावर उतरून त्यांनी पुणे विद्यापीठापर्यंतचा प्रवास पायी केला. प्रवेश मिळाला खरा; मात्र वसतिगृहात जागा न मिळाल्याने त्यांना निराश होऊन परतावे लागले. पुढे यूपीएससीच्या तयारीच्या काळात त्यांनी जयकर ग्रंथालय आणि रानडे इन्स्टिट्यूटच्या ग्रंथालयात मन लावून अभ्यास केला. मित्राच्या खोलीवर ‘पॅरासाईट’ म्हणून राहताना ढेकणांच्या त्रासामुळे अनेक रात्री त्यांना झोपही लागत नसे. याच काळात रस्त्यावरील गाड्यांवर मी पहिल्यांदाच चायनीज खाल्लं होतं, अशी आठवण त्यांनी शेअर केली.

आज जर मी तेच स्ट्रीट फूड खाल्लं, तर माझा घसाच बसेल

छत्रपती संभाजीनगर येथील डॉ. बाबासाहेब आंबेडकर मराठवाडा विद्यापीठात एम.ए.चे शिक्षण घेत असताना आर्थिक परिस्थिती अत्यंत बेताची होती. मर्यादित पैशांत दिवस काढताना ऑम्लेट-पाव आणि फरसाण-केळी हेच त्यांच्या रोजच्या आहाराचे मुख्य आधार होते. “आज जर मी तेच स्ट्रीट फूड खाल्लं, तर माझा घसाच बसेल,” अशी त्यांनी मिश्कीलपणे टिप्पणी केल्यानंतर सभागृहात एकच हशा पिकला.

‘तुकाराम मुंढे साहेबांचा नंबर द्या’, आम्हाला त्यांच्याशी बोलायचे आहे

तुकाराम मुंढे यांनी लोकांना तक्रार करण्यासाठी हेल्पलाइन नंबर जारी केला असून, यावर अनेक तक्रारी येत आहेत. असाच एक मिश्कील किस्सा त्यांनी सांगितला. “एकदा एफडीएचा एक अधिकारी माझ्याकडे आला आणि म्हणाला, ‘साहेब, मला रात्रीची ड्युटी नको.’ त्यावर मी त्याला सांगितले की, ‘रात्री तर कामाचा ताण तुलनेने कमी असतो.’ मात्र त्याने सांगितले की खरी अडचण वेगळीच आहे. रात्री १२-१ वाजल्यानंतर दारू पिऊन अनेक जण फोन करतात आणि ‘तुकाराम मुंढे साहेबांचा नंबर द्या, आम्हाला त्यांच्याशी बोलायचे आहे,’ अशी मागणी करतात.

आम्ही त्यांना तक्रार नोंदवण्यास सांगितले, तर ते म्हणतात, ‘मी सध्या बारमध्ये बसून ड्रिंक्स घेतोय आणि इथली दारू योग्य दर्जाची वाटत नाही. याची तक्रार मला थेट मुंढे साहेबांकडे करायची आहे. नाहीतर तुम्ही लगेच एफडीएची टीम इथे पाठवा.’”हा किस्सा सांगताच सभागृहात एकच हशा पिकला.

Gawadewadi Firing Case: पुणे पोलिसांची धडक कारवाई! गोळीबार करून सोने लुटणारे १२ तासांत इंदूरमधून जेरबंद