BCCI Secretary Devajit Saikia Breaks Silence On Meeting Mohsin Naqvi Asia Cup Trophy Row : महिला आशिया चषक २०२६ च्या अंतिम फेरीत भारताने श्रीलंकेचा धुव्वा उडवत आठव्यांदा जेतेपद पटकावले; मात्र सामन्यानंतर पुन्हा एकदा ‘ट्रॉफी वाद’ उफाळून आला. हरमनप्रीत कौरच्या नेतृत्वाखालील संघाने पीसीबी आणि एसीसी अध्यक्ष मोहसिन नक्वी यांच्या हस्ते ट्रॉफी स्वीकारण्यास स्पष्ट नकार दिला. २०२५ मध्ये सूर्यकुमार यादवच्या नेतृत्वाखालील पुरुष संघानेही अशीच भूमिका घेतली होती. मात्र, मैदानात नकार दिल्यानंतर दुबई स्टेडियमच्या रॉयल बॉक्समध्ये बीसीसीआय सचिव देवजीत सैकिया आणि उपाध्यक्ष राजीव शुक्ला नक्वींची भेट घेताना कॅमेऱ्यात कैद झाले. यावरून सोशल मीडियावर टीकेची झोड उठल्यानंतर सचिव देवजीत सैकिया यांनी अखेर मौन सोडले आहे.

‘कुणीही येऊन बसू शकतं, ती केवळ औपचारिकता’; सैकियांचा थेट खुलासा!

रॉयल बॉक्समधील त्या व्हायरल भेटीवर वृत्तसंस्थेला दिलेल्या मुलाखतीत देवजीत सैकिया म्हणाले, “नाणेफेकीपासून सामना संपेपर्यंत मी रॉयल बॉक्सच्या बाहेरील आसनांवर बसलो होतो. सामन्यादरम्यान अनेक मान्यवर भेटायला आले. आधी राजीव शुक्ला आले आणि नंतर उपाध्यक्ष खालिद अल जरूनी यांच्यासोबत मोहसिन नक्वीही तिथे येऊन बसले. कोणी समोर आल्यावर संवाद साधणे ही एक सामान्य शिष्टाचार परंपरा आहे. आम्ही त्या परिस्थितीतून तोडगा काढण्याचा प्रयत्न केला, पण यश आले नाही. ट्रॉफी कोणी दिली यापेक्षा भारतीय संघाने सहजतेने विजेतेपद पटकावणे आमच्यासाठी महत्त्वाचे होते आणि त्यात आम्ही यशस्वी ठरलो. आम्हाला या निर्णयाचा कोणताही पश्चाताप नाही.”

पहलगाम दहशतवादी हल्ल्याची जखम; सैन्याशी संघर्ष असताना ट्रॉफी कशी घेणार?

Team India ने Mohsin Naqvi से क्यों नहीं ली Asia Cup Trophy, Devajit Saikia का बड़ा बयान|PCB|ACC #INDvsSL #WomensAsiaCup2026 #AsiaCup2026 #TeamIndia #IndianWomensCricket #MohsinNaqvi #AsiaCupFinal #TrophyControversy #CricketNews #BreakingNews #WomenInBlue #indiachampions pic.twitter.com/W3rqmx9Y8q

— @navodayatimes (@navodayatimes13) September 14, 2026

सैकिया यांनी पुढे स्पष्ट केले की, एप्रिल २०२५ मधील पहलगाम दहशतवादी हल्ल्यानंतर दोन्ही देशांतील परिस्थिती पूर्णपणे बदलली आहे. सीमाभागात लष्करी तणाव सुरू असताना देशाच्या भावनांचा आदर करणे आमचे कर्तव्य आहे. भारत सरकारच्या धोरणानुसार बहुराष्ट्रीय स्पर्धांमध्ये पाकिस्तानविरुद्ध खेळणे बंधनकारक असले, तरी त्यांच्या सर्व अटी मान्य करणे आवश्यक नाही. भारताच्या राष्ट्रीय हितांविरोधात भूमिका घेणाऱ्या पाकिस्तानच्या गृहमंत्र्यांच्या (मोहसिन नक्वी) हातून भारतीय संघ कधीही ट्रॉफी स्वीकारणार नाही, असा ठाम पवित्रा त्यांनी मांडला.

हेही वाचा – Shree Charani Record : श्री चरणीने फायनलमध्ये ४ विकेट्स घेत रचला इतिहास! एका वर्षात ‘हा’ खास पराक्रम करणारी ठरली पहिली भारतीय गोलंदाज

महिला संघाने दाखवली पुरुषांप्रमाणेच एकजूट; खेळावर कोणताही परिणाम नाही!

गेल्या वर्षी पुरुष संघाने घेतलेल्या राष्ट्रहितैषी भूमिकेला भारतीय महिला संघानेही पाठिंबा दर्शवत देशाप्रती असलेली एकजूट सिद्ध केली आहे. या वादाचा खेळाडूंच्या कामगिरीवर किंवा मनोबलावर कोणताही विपरीत परिणाम होत नाही, असे सांगत सैकिया यांनी खेळाडूंच्या राष्ट्रनिष्ठेचे कौतुक केले. या स्पष्टीकरणामुळे दुबईतील भेटीभोवती निर्माण झालेल्या चर्चांना पूर्णविराम मिळाला आहे.