चिंबळी : पुणे-नाशिक राष्ट्रीय महामार्गाजवळील खेड तालुक्यातील औद्योगिक पट्ट्यात असलेल्या कुरुळी व चिंबळी येथील बर्गेवस्ती शिव रस्त्याला सध्या कचराकुंडीचे स्वरूप आले आहे. या मार्गावर उघड्यावर मोठ्या प्रमाणात घनकचरा टाकला जात असल्याने कचऱ्याचे साम्राज्य निर्माण झाले आहे. परिणामी स्थानिक ग्रामस्थांचे आरोग्य धोक्यात आले असून, येथून ये-जा करणारे वाहनचालक व कामगार तीव्र संताप व्यक्त करत आहेत.

औद्योगिक विस्तारामुळे कुरुळी परिसरात लोकसंख्या झपाट्याने वाढली आहे. मात्र, त्यासोबतच कचऱ्याची समस्याही उग्र बनली आहे. बर्गेवस्ती शिव रस्त्याच्या कडेला प्लास्टिक, शिळे अन्न, कंपन्यांचा टाकाऊ माल आणि इतर घातक कचरा टाकला जात आहे. हा कचरा सडल्याने परिसरात प्रचंड दुर्गंधी पसरली असून डासांचा प्रादुर्भाव वाढला आहे. त्यामुळे लहान मुले व ज्येष्ठ नागरिकांमध्ये साथीचे आजार पसरण्याची भीती व्यक्त होत आहे.

हा रस्ता औद्योगिक वसाहतीला जोडणारा मुख्य मार्ग असल्याने येथून कामगार व वाहनचालकांची मोठी वर्दळ असते. रस्त्यापर्यंत पसरलेल्या कचऱ्यामुळे वाहनचालकांना कसरत करावी लागत असून दुर्गंधीमुळे ‘नाक मुठीत धरून’ प्रवास करावा लागत आहे. तसेच, रात्रीच्या वेळी या कचऱ्यामुळे अपघात होण्याची शक्यताही वाढली आहे.

ग्रामस्थांच्या मुख्य मागण्या

शिव रस्त्यावरील साठलेला घनकचरा तातडीने हटवण्यात यावा. उघड्यावर कचरा टाकणाऱ्यांवर प्रशासनाने कडक दंडात्मक कारवाई करावी. औद्योगिक पट्ट्यात कचरा व्यवस्थापनाची कायमस्वरूपी यंत्रणा उभी करावी.