बारामती : दुबई येथे नुकत्याच पार पडलेल्या प्रतिष्ठित वर्ल्ड माइंड स्पोर्ट्स चॅम्पियनशिपमध्ये बारामतीच्या पोद्दार इंटरनॅशनल स्कूलमधील इयत्ता पहिलीतील विद्यार्थी राजवीर निकेत फडे याने ऑडिटरी मॅथ गटात विजेतेपद पटकावून भारताचा गौरव वाढवला.

राजवीरने आपल्या गटात अत्यंत प्रभावी कामगिरी करत चॅम्पियनचा किताब मिळवला. “राजवीरने जागतिक स्तरावर भारताला गौरव मिळवून दिला आहे. ही आमच्यासाठी अत्यंत अभिमानाची बाब आहे,” असे जिनिअस किडचे संस्थापक युसेबियस नोरोन्हा यांनी सांगितले.

या यशामुळे राजवीरचे सर्वत्र कौतुक होत आहे. त्याच्या कर्तृत्वाची कीर्ती आता जागतिक पातळीवर पोहोचली आहे. पोद्दार इंटरनॅशनल स्कूल, शिक्षक आणि पालकांकडून राजवीरवर अभिनंदनाचा वर्षाव होत आहे. त्याच्या या उल्लेखनीय कामगिरीमुळे बारामतीचा नावलौकिक वाढला असून, स्थानिकांचा अभिमान उंचावला आहे.