प्रभात वृत्तसेवा बारामती – पुणे जिल्ह्यात सर्वात मोठी असलेल्या बारामती नगरपरिषदेच्या नगराध्यक्षपदासाठी सर्वसाधारण पुरुष म्हणजेच खुला प्रवर्ग आरक्षण जाहीर झाले आहे. त्यामुळे यंदा नगरपरिषदेच्या निवडणुकीत चांगलीच रंगत भरणार असून नगराध्यक्षपदासाठी इच्छुकांची मांदियाळी असणार आहे. दरम्यान, नगरपरिषदेत अजित पवार यांचे वर्चस्व असले तरी प्रस्थापित नेत्यांमध्ये चुरस दिसून येणार आहे. त्यामुळे उमेदवारी देताना अजित पवार यांना समतोल साधावा लागणार आहे.नऊ वर्षानंतर नगरपरिषदेची निवडणूक होत असल्याने नगरपरिषदेच्या नगराध्यक्ष पदाच्या आरक्षणाकडे सर्वांच्या नजरा लागल्या होत्या. अखेर खुल्या प्रवर्गातून आरक्षण जाहीर झाल्यानंतर सर्वांना संधी निर्माण झाली आहे. त्यामुळे नगराध्यक्ष पदासाठी इच्छुक आपली शक्ती पणाला लावणार, यात शंका नाही. खुला प्रवर्गातून आरक्षण असल्याने इच्छुकांची गर्दी मोठ्या प्रमाणात असणार आहे. राष्ट्रवादी काँग्रेस अजित पवार गटाचे बारामती नगरपरिषदेवर वर्चस्व आहे. त्यामुळे अजित पवार गटात इच्छुकांची संख्या देखील मोठी असणार आहे. यंदा नगराध्यक्ष पदाची निवडणूक जनतेतून असल्याने पाच वर्षांचा कालावधी नगराध्यक्षपदासाठी मिळणार आहे. त्यामुळे कोणत्याही परिस्थितीत नगराध्यक्षपदाची उमेदवारी आपल्यालाच मिळावी यासाठी प्रस्थापित नेते मंडळी मुख्यमंत्री अजित पवार यांच्या बाजूला ठाण मांडून असणार यात शंका नाही.बारामती नगरपरिषदेची या अगोदरची निवडणूक 2016 रोजी झाली होती. नगरपरिषदेची मुदत 18 फेब्रुवारी 2022 रोजी संपुष्टात आल्यानंतर तीन वर्षांचा कालावधी उलटूनही राज्यात स्थानिक स्वराज्य संस्थांच्या निवडणूकाच झालेल्या नव्हत्या. सर्वोच्च न्यायालयाच्या आदेशानंतर अखेर आता निवडणूकीच्या प्रक्रियेला झाल्यानंतर (दि.६) नगराध्यक्षपदाची आरक्षण सोडत झाली. सर्वसाधारण पुरुष आरक्षण पडल्यामुळे पुन्हा उत्साहाचे वातावरण आहे. अनेक इच्छुकांनी आता निवडणूका होणार असे दिसताच मोर्चेबांधणीस प्रारंभ केला आहे. नगरपरिषदेचे वीस प्रभाग असून यातून 41 नगरसेवक निवडून जाणार आहेत. 19 प्रभागांत प्रत्येकी दोन नगरसेवक तर विसाव्या प्रभागातून तीन नगरसेवक निवडून जातील. यामध्ये पन्नास टक्के आरक्षण महिलांना असल्याने निम्म्या जागांवर महिला नगरसेविका निवडून जाणार आहेत. पुणे जिल्ह्यात बारामती ही एकमेव अ वर्ग नगरपरिषद असून सर्वाधिक नगरसेवक संख्या असलेली नगरपरिषद म्हणून ओळखली जाते. बारामती नगरपरिषदेच्या निवडणुकीत नगराध्यक्षपदासाठी खुल्या प्रवर्गातील पुरुष, असे आरक्षण जाहीर झाल्यानंतर प्रस्थापित नेतेमंडळींचा उत्साह दुणावला आहे. अजित पवार यांच्या राष्ट्रवादीचे वर्चस्व असलेल्या नगरपरिषदेत पुन्हा तेच तेच चेहरे नगराध्यक्ष म्हणून निवडले जाणार की नवख्या चेहऱ्यांना संधी मिळणार, हे औत्सुक्याचे ठरणार आहे. बारामतीत विविध संस्थांमध्ये उपमुख्यमंत्री पवार जुन्या नव्यांचा मेळ साधत असतात. बारामती नगरपरिषदेत देखील तेच होणार की बहुतांश नवीन चेहरे येणार याकडे देखील लक्ष लागले आहे. बारामती नगरपरिषद निवडणुकीसाठी प्रभाग आरक्षण सोडत बुधवार (दि.८) नगरपरिषदेच्या सभागृहात होणार आहे. (दि.११) पासून ही प्रक्रिया पार पडणार आहे. कोणत्या प्रभागात कोणते आरक्षण पडणार, याकडे देखील सर्वांचे लक्ष लागले आहे.
