बारामती – अष्टविनायक तीर्थक्षेत्र मोरगांव (ता. बारामती) येथे आजपासून माघी यात्रा उत्सव सुरु झाला असून मुक्तद्वार दर्शनाचा पहीला दिवस संपन्न झाला. यानिमित्ताने हजारो भावीकांनी श्रींना जलस्नान व अभीषेक पुजा करण्यासाठी गर्दी केली होती. यानंतर दुपारी तीन वाजता मयुरेश्वरास भरजडीत पोशाख चढविण्यात आला.

आज (दि . २२) पासून मोरगाव येथील माघी यात्रा उत्सव सुरु झाला. यानिमित्ताने पहाटे पाच वाजता गुरव मंडळींची प्रक्षाळ पुजा झाल्यानंतर मंदिराचा मुख्य गाभारा श्रींना जलस्नान घालण्यासाठी सर्व भक्तांसाठी खुला करण्यात आला असल्याची माहीती विश्वस्त विनोद पवार यांनी दिली. तसेच आज पहाटेपासून द्वारयात्रेस सुरवात झाली. गणेश कुंडावर आंघोळ करून द्वार ठिकाणी अनवानी चालत जाऊन दुर्वा, फुले, शमी वाहण्याची विशिष्ट अशी प्रथा आहे. आज मयुरेश्वर मंदिराच्या पुर्वेकडील असणारा धर्म द्वाराचा टप्पा आज संपन्न झाला.

गणेश कुंडाची स्वच्छता ग्रामपंचायत मोरगाव व तरुण मंडळाच्यावतीने करण्यात आली. आज दुपारी १२ वाजता चिंचवड येथून मोरगाव येथे येण्यासाठी मोरया गोसावी प्राप्त मंगलमुर्ती पालखी सोहळाचे प्रस्थान झाले. मयुरेश्वरास आज दुपारी तीन वाजण्याच्या सुमारास हिरे, माणिक, मोती युक्त, भरजडीत पोशाख व सुवर्णालंकार चढवले. श्रींना चढविण्यात आलेला पोशाख पाहण्यासाठी गावातील अनेक भावीक आले होते.

यात्रेच्या निमित्ताने वडगांव निंबाळकर पोलीस स्टेशनच्यावतीने सचिन काळे यांच्या मार्गदर्शनाखाली चोख बंदोबस्त ठेवला होता. रात्री श्रींचा छबिना निघणार असुन उद्या पश्चिमेकडील अर्थद्वाराचा टप्पा संपन्न होणार आहे.