बारामती (प्रतिनिधी) – गोबर गॅसच्या टाकीमध्ये कालवलेल्या शेणकाल्यामध्ये पडून बारामती तालुक्यातील खांडज येथील चार जणांचा दुर्दैवीरीत्या मृत्यू झाला. यामध्ये मुलाला वाचवण्यासाठी गेलेल्या वडील आणि चुलत्या बरोबरच शेजारी व्यक्तीलासुद्धा यामध्ये आपला जीव गमवावा लागला. या दुर्दैवी घटनेने बारामती तालुक्यात खळबळ उडाली असून खंडज गावात शोककळा पसरली आहे.

प्रकाश सोपान आटोळे, प्रविण भानुदास आटोळे, भानुदास आनंदराव आटोळे, बापुराव लहूजी गव्हाणे अशी या चार जणांची नावे आहेत. या घटनेने परिसरात मोठी खळबळ उडाली आणि अनेकांना धक्का बसला. एकाच कुटुंबातील तिघा जणांना यामध्ये जीव गमवावा लागला. बारामती तालुक्यातील ही अलीकडच्या काळातील सर्वात मोठी दुर्दैवी घटना आहे.

ही घटना घडल्यानंतर लगेचच त्यांना बारामतीतील सिल्वर जुबिली शासकीय उपजिल्हा रुग्णालयामध्ये उपचारासाठी दाखल करण्यात आले. मात्र उपचारापूर्वीच त्यांचा मृत्यू झाल्याचे डॉक्टरांनी जाहीर केले. या संदर्भातील अधिक माहिती वैद्यकीय अधिकारी डॉक्टर महेश जगताप यांनी दिली.