विश्रांतवाडी – आमदारकीच्या काळात पठारे यांनी मोठ्या प्रमाणात विकासकामे केल्याने मतदारसंघाचे नाव जागतिक पातळीवर पोहोचले. त्यामुळे खराडीसह मतदारसंघातील विविध भागात अनेक नामांकित आंतरराष्ट्रीय आयटी कंपन्या सुरू झाल्या आहेत. त्यांच्या विकासाभिमुख व दूरदृष्टीमुळेच हे शक्य झाले आहे.

नक्कीच त्याचा फायदा मतदानात त्यांना होणार आहे. पठारे नक्की निवडून येतील यात काही शंका नाही, असा विश्वास माजी खासदार ऍड.वंदना चव्हाण यांनी व्यक्त केला. आगामी काळातही एक उत्तम लोकप्रतिनिधी म्हणून ते या मतदारसंघाला न्याय देतील, असेही त्या म्हणाल्या.

खराडी भागात खासदार चव्हाण यांच्या नेतृत्वाखाली प्रचार फेरी काढण्यात आली. यावेळी त्या बोलत होत्या. यावेळी प्रचार फेरीला नागरिकांचा मोठा प्रतिसाद मिळाला. यशवंत नगर, बोराटे नगर, राघवेंद्र नगर, तुकाराम नगर, शेजवळ पार्क, सोनाई पार्क, विडी कामगार वसाहत परिसरात पठारे यांनी झंझावती प्रचार केला. प्रचार फेरीत महाविकास आघाडीचे पदाधिकारी, कार्यकर्ते व नागरिक मोठ्या संख्येने सहभागी झाले होते.

बापूसाहेब पठारे म्हणाले की, खराडी-शिवणे रस्ता तातडीने पूर्ण करणार आहे. त्यामुळे नगर रस्त्यावरील वाहतूक कोंडी कमी होण्यास मदत होईल. एक चांगला पर्यायी रस्ता म्हणून संपूर्ण मतदारसंघासोबतच पुणेकरांना मोठा फायदा होईल. मागील १० वर्षांत या रस्त्याकडे अक्षरशः दुर्लक्ष करण्यात आले आहे.

हा रस्ता कुणी रखडवला? वाहतूक कोंडीचा प्रश्न सोडवू शकणारा हा रस्ता अर्धवट का सोडला? असे अनेक प्रश्न आहेत. खराडी, वडगावशेरी, कल्याणीनर, वारजे, शिवणे नदीकाठच्या रस्त्याचे काम पूर्ण व्हावे, यासाठी वारंवार तत्कालीन शासनकर्ते, पालकमंत्री, महापालिका आयुक्त यांच्यासोबत पत्रव्यवहार केला. परंतु, हे काम पूर्ण करण्यात प्रशासन अपयशी ठरले आहे, असेही पठारे यांनी सांगितले.