Bapusaheb Pathare : लोहगावमधील डी. वाय. पाटील रस्ता, लोहगाव-निरगुडी रस्ता, लोहगाव-वाघोली ते काळभोर वस्ती रस्ता, माळवाडी रस्ता, पठारे वस्ती रस्ता तसेच पवार वस्ती रस्ता ही कामे अनेक वर्षांपासून प्रलंबित आहेत. या संदर्भात संबंधित अधिकाऱ्यांसोबत अनेक बैठका तसेच पाच वेळा प्रत्यक्ष स्थळ पाहणी करूनही ठोस कार्यवाही झालेली नाही, येत्या आठ दिवसांत या रस्त्यांची कामे सुरू झाली नाहीत तर सार्वजनिक बांधकाम विभागाच्या अधीक्षक अभियंता कार्यालयासमोर धरणे आंदोलन करण्यात येईल, असा इशारा आमदार बापूसाहेब पठारे यांनी दिला आहे. लोहगावमधील अनेक वर्षांपासून प्रलंबित असलेल्या रस्त्याच्या कामांसंदर्भात आमदार पठारे यांनी अधीक्षक अभियंता भरतकुमार बाविस्कर यांना निवेदन देत नाराजी व्यक्त केली आहे. ड्रेनेज व पिण्याच्या पाण्याच्या लाइनची कामे पूर्ण होण्यापूर्वीच रस्त्यांची कामे सुरू करण्यात आली. ही बाब संबंधित अधिकाऱ्यांच्या निदर्शनास आणून दिल्यानंतर सदर कामे पूर्ण करण्यात आली असली, तरीही रस्त्यांचे काम अद्याप सुरू झालेले नाही. वारंवार पाठपुरावा करूनही विभागाकडून विविध कारणे देत कामास विलंब केला जात आहे. संबंधित ठेकेदाराकडूनही कोणतीही ठोस कार्यवाही होताना दिसत नाही, असे आमदार पठारे यांनी निवदेनात म्हटले आहे. खराब रस्ते, उडणारी धूळ आणि वाहतूक कोंडीमुळे नागरिकांना मोठ्या प्रमाणावर त्रास सहन करावा लागत आहे. येत्या काही दिवसांत लोहगावची यात्रा होणार असल्याने परिस्थिती आणखी गंभीर होण्याची शक्यता आहे. या सर्व बाबींचा विचार करून पुढील आठ दिवसांत कामे प्रत्यक्ष सुरू करावीत, अन्यथा नागरिकांच्या भावना लक्षात घेऊन विधिमंडळाचे अर्थसंकल्पीय अधिवेशन सुरू असतानाही सार्वजनिक बांधकाम विभागाच्या अधीक्षक अभियंता कार्यालयासमोर धरणे आंदोलन करण्यात येईल, असा इशारा आमदार पठारे यांनी दिला आहे. Madhuri Misal : राज्यमंत्र्यांनी मागितला पालिकेकडे खुलासा; पर्वती मतदारसंघ निधी प्रस्तावावरून वाद
