मुंबई : गणेशोत्सवाच्या काळात मराठा आरक्षणाच्या मागणीसाठी मनोज जरांगे यांच्या नेतृत्वाखाली मुंबईत सलग पाच दिवस चाललेल्या आंदोलनाने शहरवासीयांना प्रचंड त्रास सहन करावा लागला. आझाद मैदानात लाखो मराठा बांधव एकत्र आले, पण यामुळे दक्षिण मुंबईत वाहतूक कोंडी, कचरा संकट आणि गणेशभक्तांना नाहक गैरसोय झाली.

आता या पार्श्वभूमीवर शिवसेना शिंदे गटाचे राज्यसभा खासदार मिलिंद देवरा यांनी ३ सप्टेंबर २०२५ रोजी मुख्यमंत्री देवेंद्र फडणवीस यांना पत्र लिहून दक्षिण मुंबईतील आंदोलने शहराबाहेर हलवण्याची मागणी केली आहे. यावर शिवसेना ठाकरे गटाचे खासदार संजय राऊत यांनी सोशल मीडियावरून (ट्विटरवर) जोरदार हल्लाबोल केला असून, शिंदे गटाचा ‘खरा चेहरा’ उघड झाल्याचे म्हटले आहे.

मराठा आरक्षणाच्या मागणीसाठी मनोज जरांगे यांनी ‘चलो मुंबई’चा नारा दिला आणि अंतरवली सराटीहून हजारो समर्थकांसह मुंबईत दाखल झाले. आझाद मैदानावर २९ ऑगस्टपासून सुरू झालेल्या या उपोषणाने पाच दिवस शहराला वेढले. लाखो मराठ्यांनी सहभाग घेतला, पण यामुळे दक्षिण मुंबईत प्रचंड वाहतूक कोंडी झाली. रस्त्यांवर कचरा साचला, गणेशोत्सवात भक्तांना अडथळे आले आणि सामान्य नागरिकांच्या दैनंदिन कामकाजावर परिणाम झाला.

बॉम्बे हायकोर्टानेही आंदोलकांना रस्ते मोकळे करण्याचे आदेश दिले, पण जरांगे यांनी मागण्या मान्य होईपर्यंत माघार न घेण्याचा निर्धार व्यक्त केला. शेवटी, २ सप्टेंबरला सरकारने जरांगे यांच्या आठ मागण्या पैकी सहा मान्य केल्या, ज्यात हैदराबाद गॅझेटनुसार मराठा कुनबी प्रमाणपत्र देणे आणि ओबीसी आरक्षणाचा लाभ यांचा समावेश आहे. यामुळे आंदोलन संपले आणि जरांगे यांनी विजयाची घोषणा केली.

दक्षिण मुंबईत आंदोलनांना प्रतिबंध घाला, मिलिंद देवरांचे पत्र

मिलिंद देवरा यांनी पत्रात मुंबईच्या महत्त्वावर भर दिला आहे. मुंबई हे राज्याचे आणि देशाचे आर्थिक-राजकीय केंद्र असून, मंत्रालय, विधानभवन, पोलीस आयुक्तालय, नौदल मुख्यालय, बँका आणि कंपन्यांचे कार्यालये येथे आहेत. लाखो लोकांचे जीवन या व्यवस्थेवर अवलंबून आहे.

आंदोलनांमुळे प्रशासकीय कामकाज थांबते, रस्ते बंद होतात आणि सामान्य नागरिकांना त्रास होतो. आंदोलनाचा अधिकार असला तरी, सामान्यांना होणारा त्रास टाळण्यासाठी दक्षिण मुंबईतील उच्च-सुरक्षा क्षेत्रातील आंदोलने (जसे आझाद मैदान) शहराबाहेर हलवावीत, अशी मागणी देवरा यांनी केली आहे

“महाराष्ट्र सरकारला विनंती करतो की, दक्षिण मुंबईच्या उच्च सुरक्षा आणि उच्च कार्यक्षम क्षेत्रांपासून अशा निदर्शनांना प्रतिबंधित किंवा स्थलांतरित करण्यासाठी आवश्यक पावले उचलावीत,” असे पत्रात नमूद आहे. यामुळे नागरिकांचे हक्क जपले जातील आणि मुंबईचे कामकाज सुरळीत चालेल, असं देवरा यांचे म्हणणे आहे. देवरा यांच्या या पत्राने शिंदे गटाच्या भूमिकेवर प्रश्नचिन्ह उपस्थित झाले असून, मराठा समाजाच्या भावनांना धक्का बसल्याचे मत व्यक्त होत आहे.

अमित शहा पुरस्कृत शिंदे गटाचा खरा चेहरा उघड : संजय राऊत

मिलिंद देवरांच्या पत्रावर संजय राऊत यांनी ट्विट करून तीव्र नाराजी व्यक्त केली. “अमित शहा पुरस्कृत शिंदे गटाचा हाच खरा चेहरा आहे! मुंबईत मराठी माणूस त्यांच्या न्याय्य मागण्यासाठी एकवटला याची पोटदुखी उघड झाली. शिंदे गटाचे खासदार मिलिंद देवरा यांनी दक्षिण मुंबईत मराठी माणसाच्या आंदोलनास परवानगी देऊ नये, असे मुख्यमंत्र्यांना लिहिले. बाळासाहेबांचा फोटो वापरणे बंद करा!” असे खोचक टोला राऊत यांनी लगावला.

त्यांनी शिंदे गटाला ‘मराठी माणसाविरोधी’ ठरवले आणि मराठा आरक्षणाच्या आंदोलनाला पाठिंबा दिला. राऊत यांनी यापूर्वीही आंदोलनाच्या वेळी सरकारवर टीका केली होती, ज्यात मुंबईत कबुतरांसाठी आंदोलने मान्य पण मराठी माणसाला बंदी का, असा प्रश्न उपस्थित केला होता. या ट्विटमुळे राजकीय वाद तापला असून, शिंदे गटाने अद्याप प्रत्युत्तर दिलेले नाही.