मुंबई : नाशिकच्या राजकारणात खळबळ उडवणाऱ्या सुधाकर बडगुजर यांच्या भाजप प्रवेशावर सध्या टांगती तलवार आहे. शिवसेना (ठाकरे गट) मधून हकालपट्टी झालेल्या बडगुजरांनी मुख्यमंत्री देवेंद्र फडणवीस यांची भेट घेतल्यानंतर पक्षप्रवेशाची तयारी दर्शवली होती. आज (17 जून 2025) सकाळी हजारो कार्यकर्त्यांसह ते मुंबईच्या नरिमन पॉईंट येथील भाजप मुख्यालयात प्रवेशासाठी रवाना झाले.

मात्र, मंत्री गिरीश महाजन यांच्या पुढाकाराने होणाऱ्या या सोहळ्यावर प्रदेशाध्यक्ष चंद्रशेखर बावनकुळे यांनी पाणी फेकले आहे. बावनकुळे यांनी प्रवेशाबाबत कोणतीच माहिती नसल्याचे सांगत स्थानिक नेत्यांचा विरोध असल्याचे स्पष्ट केले, ज्यामुळे राजकीय वर्तुळात चर्चांना उधाण आले आहे.

कॅसिनो वादाचा वचपा काढला?

बडगुजर आणि बावनकुळे यांच्यातील वादाची मुळे काही महिन्यांपूर्वीच्या कॅसिनो प्रकरणात दडलेली असल्याचे दिसते. बावनकुळे यांचे मकाऊतील कॅसिनो खेळतानाचे फोटो खासदार संजय राऊत यांनी ट्विट केले होते, ज्यामुळे खळबळ उडाली होती. या फोटोंचा उल्लेख बडगुजर यांच्यामार्फत राऊतांपर्यंत पोहोचवल्याचा आरोपही झाला होता.

बावनकुळे यांनी यावर स्पष्टीकरण देताना सांगितले होते, “हाँगकाँगला कुटुंबासोबत गेलो असता, हॉटेलमधील कॅसिनो क्रॉस करताना फोटो काढला गेला. हा बदनामीचा प्रयत्न होता.” या प्रकरणानंतर बावनकुळे यांचा बडगुजरांवर राग असल्याची शक्यता व्यक्त होत आहे.

मुंबई बॉम्बस्फोट प्रकरणाचा वाद

त्यातच, बडगुजर यांचा मुंबई बॉम्बस्फोट प्रकरणातील आरोपी सलीम कुत्तासोबत नाचताना दिसणारा व्हिडीओ भाजप मंत्री नितेश राणे यांनी विधानसभेत सादर केला होता. त्यामुळे बडगुजरांना देशद्रोही ठरवण्यात आले होते. आता त्याच पक्षात त्यांचा प्रवेश होण्याच्या शक्यतेने राजकीय वर्तुळात संभ्रम निर्माण झाला आहे. बावनकुळे यांनी स्थानिक नेत्यांचा विरोध आणि निवडणुकीतील वैराचा हवाला देत प्रवेशाला हरकत घेतल्याचे दिसते.

प्रवेशावर संशयाची सावली

बडगुजरांनी मुंबई गाठल्यानंतरही बावनकुळे यांच्या भूमिकेमुळे प्रवेश सोहळ्यावर प्रश्नचिन्ह निर्माण झाले आहे. बडगुजरांनी मात्र आत्मविश्वास दाखवत सर्व ठरले असल्याचे सांगितले आहे. मात्र, कॅसिनो वाद आणि स्थानिक विरोध यामुळे हा प्रवेश अखेर होईल की नाही, याकडे सर्वांचे लक्ष लागले आहे.

सुधाकर बडगुजर यांची राजकीय कारकीर्द

सुधाकर बडगुजर यांनी आपल्या राजकीय कारकीर्दला २००७ पासून सुरूवात केली. नाशिक महापालिकेत पहिल्यांदा ते अपक्ष नगरसेवक म्हणून निवडून आले होते. महापालिकेच्या महापौरपदी शिवसेनेचे विनायक पांडे हे अपक्ष नगरसेवकांच्या पाठिंब्यावर विराजमान झाले. या अपक्षांमध्ये सुधाकर बडगुजर हे देखील होते. त्यानंतर त्यांची शिवसेनेसोबत जवळीक वाढत गेली.२००८ मध्ये एका जलकुंभाच्या भूमिपूजन कार्यक्रमात त्यांनी शिवेसनेत पक्ष प्रवेश केला. बडगुजर यांच्या आक्रमक शैलीमुळे पक्षाने त्यांच्याकडे 2009 ते 2012 अशी तीन वर्ष नाशिक महापालिकेचे सभागृहनेते पद सोपवले होते.

२०१४ मध्ये बडगुजर यांना नाशिक पश्चिम विधानसभा मतदारसंघाची उमेदवारी पक्षाकडून मिळाली. मात्र, त्यांचा निवडणुकीत पराभव झाला. त्यानांतर २०१९ मध्ये पुन्हा त्यांना संधी देण्यात आली. पुन्हा एकदा त्यांच्या वाटेला पराभव आला. यंदाच्या निवडणुकीत देखील सुधाकर बडगुजर यांचा पराभव झाला. त्यानंतर पक्षाने त्यांच्यावर नाशिक जिल्हाप्रमुख पदाची सुत्रे सोपवली. आता त्यांची उपनेते पदी नियुक्ती करण्यात आली आहे. बडगुजर यांच्यावर काही वादग्रस्त प्रकरणे देखील आहेत. ज्यामुळे ते अनेकदा चर्चेत आले होते.