Ayodhya Ram Mandir । Bomb Threat – उत्तर प्रदेशातील अयोध्येतील राम मंदिर बॉम्बने उडवून देण्याची धमकी दिल्यानंतर येथे सुरक्षा व्यवस्था कडक करण्यात आली आहे. अयोध्येला अभेद्य किल्ल्याचे रूप आले आहे. खलिस्तानी दहशतवादी गुरपतवंत सिंग पन्नू याने १६ नोव्हेंबर रोजी हल्ल्याची धमकी दिली होती. अयोध्येच्या प्रवेशद्वारांवरील सुरक्षा बंदोबस्त कडक करण्यात आला आहे. एसपी सिक्युरिटी बलरामाचारी दुबे यांच्यासह एटीएस, सीआरपीएफ, पीएसी जवानांनी रूट मार्च काढला आणि लोकांना सुरक्षेचे आश्वासन दिले. अयोध्येच्या प्रवेशद्वारापासून रामजन्मभूमी परिसरापर्यंत मार्गक्रमण करण्यात आले. रामनगरीच्या सर्व प्रवेशद्वारांवर सीसीटीव्हीच्या माध्यमातून लक्ष ठेवण्यात येत आहे. सर्व अडथळ्यांवर सुरक्षा दल तैनात करण्यात आले आहे. रामनगरीत प्रवेश करणाऱ्या सर्व वाहनांची झडती घेतली जात आहे. बॉम्बशोधक पथक, श्वानपथक आणि एटीएससह गुप्तचर यंत्रणाही सतर्क आहेत.
