Indian sailors – अमेरिका आणि इराण यांच्यातील वाढत्या तणावाच्या पार्श्वभूमीवर, सागरी प्रशासन महासंचालनालयाने जारी केलेल्या आदेशात जहाज मालक, जहाज व्यवस्थापक आणि भरती कंपन्यांना होर्मुझच्या सामुद्रधुनीतून जाणाऱ्या जहाजांवर भारतीय खलाशांची नियुक्ती टाळण्याचे निर्देश दिले आहेत.

सरकारी आकडेवारीनुसार, भारत हा जगातील तिसरा सर्वात मोठा खलाशी पुरवठादार देश असून, जगभरातील जहाजांवर तीन लाखांहून अधिक भारतीय खलाशी कार्यरत आहेत. गेल्या तीन दिवसांत या प्रदेशात जहाजांवर झालेल्या वेगवेगळ्या हल्ल्यांमध्ये दोन भारतीय खलाशी ठार झाल्यानंतर हे पाऊल उचलण्यात आले आहे.

लष्करी गुप्तचर महासंचालनालयाने (डीजीएमए) आपल्या आदेशात म्‍हटले की, जहाज मालक, जहाज व्यवस्थापक आणि भरती कंपन्यांना पुढील सूचना मिळेपर्यंत होर्मुझच्या सामुद्रधुनीतून जाणाऱ्या जहाजांवर भारतीय खलाशांना तैनात करू नये. व्यापारी जहाजांवर अलीकडे झालेल्या हल्ल्यांमुळे संघर्षग्रस्त भागांमध्ये कार्यरत असलेल्या खलाशांवरील धोके लक्षणीयरीत्या वाढले आहेत.

पर्शियन आखातातील सुरक्षा परिस्थिती लक्षात घेता, या भागात ये-जा करणाऱ्या जहाजांवर काम करणाऱ्या भारतीय खलाशांच्या हिताचे रक्षण करण्यासाठी अधिक खबरदारीचे उपाय योजणे आवश्यक आहे, असे संचालनालयाला वाटते, असे आदेशात म्हटले आहे.

नियामकाने जहाज मालकांना पर्शियन आखात, होर्मुझची सामुद्रधुनी आणि लगतच्या पाण्यातील सुरक्षा परिस्थितीबाबत सतर्क राहण्यास आणि नौकानयनविषयक इशाऱ्यांवर सतत लक्ष ठेवण्यास सांगितले आहे. डीजीएमए बदलत्या सुरक्षा परिस्थितीवर सतत लक्ष ठेवून आहे आणि भारतीय खलाशांची सुरक्षा व कल्याण सुनिश्चित करण्यासाठी कटिबद्ध आहे, असेही या सूचनेत पुढे म्हटले आहे.

दरम्‍यान, हॉर्मुझच्या सामुद्रधुनीमध्ये या आठवड्यात एमटी अल बाहिया आणि एमटी मोम्बासा या दोन जहाजांवर झालेल्या हल्ल्यांनंतर ही मार्गदर्शक सूचना जारी करण्यात आली आहे. या जहाजांवरील एकूण ४६ जणांच्या कर्मचारी वर्गामध्ये ३० भारतीय खलाशी होते.