Atrocity Case – यशवंतराव चव्हाण स्मृती (वायसीएम) रुग्णालयातील अंतर्गत वाद आता पोलीस ठाण्यापर्यंत पोहोचला आहे. रुग्णालयाचे अधिष्ठाता डॉ. राजेंद्र नामदेव वाबळे यांच्याविरोधात संत तुकारामनगर पोलीस ठाण्यात ॲट्रॉसिटी कायद्यान्वये गुन्हा दाखल करण्यात आला आहे. माजी सहायक प्राध्यापक डॉ. ज्ञानेश्वर विश्वनाथ बोराडे यांनी याबाबत तक्रार दिली आहे.

डॉ. बोराडे यांनी डॉ. वाबळे यांच्यावर जातीवाचक अपशब्द वापरून अपमान केल्याचा आरोप केला आहे. रुग्णालयातील वैद्यकीय सेवेशी संबंधित वादातून आपल्याला जाणीवपूर्वक त्रास देण्यात आल्याचाही दावा त्यांनी तक्रारीत केला आहे. डॉ. बोराडे हे वायसीएम रुग्णालयात सहायक प्राध्यापक म्हणून कार्यरत होते. त्यांच्या कामावर रुजू होणे, गैरहजेरी आणि विभागीय चौकशीवरून वाद निर्माण झाला होता.

त्यानंतर त्यांच्या सेवेबाबत कारवाई करण्यात आली. या कारवाईविरोधात डॉ. बोराडे यांनी विविध शासकीय विभागांकडे दाद मागितल्याचे तक्रारीत नमूद आहे. दरम्यान, वायसीएममध्ये हृदयविकाराशी संबंधित वैद्यकीय सेवा सुरू करण्यावरूनही वाद असल्याचा दावा डॉ. बोराडे यांनी केला आहे.

लिफ्टसमोर अपमान केल्याचा आरोप
१० ऑगस्ट रोजी सकाळी साडेअकराच्या सुमारास डॉ. बोराडे अनुभव प्रमाणपत्र घेण्यासाठी वायसीएम रुग्णालयात गेले होते. त्यावेळी दुसऱ्या मजल्यावरील लिफ्टसमोर त्यांची डॉ. वाबळे यांच्याशी भेट झाली. अनुभव प्रमाणपत्रातील नियुक्तीच्या नोंदीबाबत त्यांनी विचारणा केली. त्यावेळी सेवेतून कमी केल्याच्या निर्णयाचा संदर्भ देण्यात आला.

त्यानंतर रुग्ण आणि कर्मचाऱ्यांच्या उपस्थितीत जातीवाचक अपशब्द वापरून आपला अपमान करण्यात आल्याचा आरोप डॉ. बोराडे यांनी तक्रारीत केला आहे. या तक्रारीच्या आधारे संत तुकारामनगर पोलिसांनी डॉ. राजेंद्र वाबळे यांच्याविरोधात गुन्हा दाखल केला आहे. प्रकरणाचा पुढील तपास पिंपरी विभागाच्या सहायक पोलीस आयुक्त मनीषा कदम करीत आहेत.