नवी दिल्ली – त्रिपुरातील सर्व 60 जागांवर आज मतदान होत आहे. एकूण 259 उमेदवार रिंगणात आहेत. या निवडणुकीत अनेक दिग्गजांचे भवितव्य पणाला लागले आहे. माणिक साहा स्वत:हा  निवडणुकीच्या मैदानात उतरले आहे.

मुख्यमंत्री डॉ. भाजपने केंद्रीय मंत्री प्रतिमा भौमिक यांनाही तिकीट दिले आहे. राज्याचे उपमुख्यमंत्रीही निवडणूक लढवत आहेत. याशिवाय विरोधी पक्षातील अनेक दिग्गज नेत्यांचे भवितव्य आज मतदार ठरवणार आहेत. त्रिपुरातील पाच हायप्रोफाईल जागांचे गणित जाणून घेऊया..

टाउन बोरदोवाली  :
पश्चिम त्रिपुरा जिल्ह्यातील या जागेवरून मुख्यमंत्री डॉ. माणिक साहा स्वतः निवडणूक लढवत आहेत. डॉ.साहा यांची थेट लढत काँग्रेस-डावी आघाडीचे आशिषकुमार साहा यांच्याशी आहे.

चारिलम :
राज्याचे उपमुख्यमंत्री जिष्णुदेव वर्मा येथून निवडणूक लढवत आहेत. जिष्णुदेव यांच्या विरोधात काँग्रेस-डाव्या आघाडीने अशोक देबबर्मा यांना उमेदवारी दिली आहे. अशोक हे काँग्रेसचे दिग्गज नेते आहेत.

धनपूर :
येथून केंद्रीय मंत्री प्रतिमा भौमिक निवडणूक लढवत आहेत. प्रतिमा भौमिक या त्रिपुरातील पहिल्या महिला आहेत ज्यांनी स्वातंत्र्याच्या 75 वर्षांनंतर केंद्रीय मंत्रीपद भूषवले आहे. प्रतिमा भौमिक या भारत सरकारच्या सामाजिक न्याय आणि सक्षमीकरण मंत्रालयाच्या राज्यमंत्री आहेत. त्रिपुरातील त्या पहिल्या केंद्रीय मंत्री आणि ईशान्येकडील दुसऱ्या महिला केंद्रीय मंत्री आहेत. प्रतिमा या त्रिपुरा पश्चिममधून लोकसभेच्या खासदार आहेत.

सबरूम :
यावेळी दक्षिण त्रिपुरातील सबरूम विधानसभा मतदारसंघातून कम्युनिस्ट पक्ष आणि काँग्रेस आघाडीने जितेंद्र चौधरी यांना उमेदवारी दिली आहे. जितेंद्र हे सीपीआयएमचे ज्येष्ठ नेते आणि मुख्यमंत्रिपदाचे प्रबळ दावेदार आहेत. भारतीय जनता पक्षाने जितेंद्र यांच्या विरोधात शंकर राय यांना उमेदवारी दिली आहे.

कैलाशहर :
उनाकोटी जिल्ह्यातील या जागेवरून प्रदेश काँग्रेस अध्यक्ष बिराजित सिन्हा निवडणूक लढवत आहेत. सिन्हा यांच्या विरोधात भाजपने मोहम्मद मोबेशर अली यांना उमेदवारी दिली आहे. त्रिपुरात निवडणूक लढवणाऱ्या भाजपच्या दोन मुस्लिम चेहऱ्यांपैकी अली हा एक आहे.

त्रिपुरात आता काय समीकरणे आहेत ?
त्रिपुरामध्ये आदिवासी समाजातील मतदारांची संख्या सर्वाधिक आहे. त्यांची संख्या सुमारे 32 टक्के आहे. 60 जागांपैकी 20 जागा अनुसूचित जमातीसाठी राखीव आहेत. 40 जागा अनारक्षित आहेत. त्यामुळे सर्वच पक्षांनी यासाठी पूर्ण ताकद लावली आहे. राज्याची बांग्लादेशशी सीमा आहे आणि 65 टक्के लोकसंख्या बंगाली भाषिक आहे. 8% मुस्लिम आहेत. 2021 मध्ये बांगलादेशातील दुर्गा पंडालमध्ये मोठ्या प्रमाणात हिंसाचार झाला होता. त्याचा परिणाम त्रिपुरामध्येही दिसून आला. येथेही अनेक जिल्ह्यांमध्ये तणावाचे वातावरण दिसून आले. गेल्या वेळी भाजप आणि आयपीएफटीने सर्व 20 राखीव जागा जिंकल्या होत्या.