Elavenil Valarivan Silver : एलावेनिल वलारिवनचा नागोयात अचूक निशाणा! भारताला मिळवून दिले दुसरे रौप्यपदक
Elavenil Valarivan Silver : सांघिक स्पर्धेत रौप्यपदक पटकावल्यानंतर, एलावेनिल वलारिवानने आता वैयक्तिक स्पर्धेतही रौप्यपदक जिंकले आहे. २०२६ च्या आशियाई क्रीडा स्पर्धेतील भारताचे हे दुसरे पदक आहे.
Asian Games 2026 Elavenil Valarivan Wins Silver 10m Air Rifle Individual Shooting : जपानमधील नागोया येथे सुरू असलेल्या आशियाई क्रीडा स्पर्धा २०२६ (Asian Games 2026) मध्ये भारताची स्टार नेमबाज एलावेनिल वलारिवनने (Elavenil Valarivan) वैयक्तिक प्रकारात चमकदार कामगिरी करत रौप्यपदकावर (Silver Medal) आपले नाव कोरले आहे. महिलांच्या १० मीटर एअर रायफल वैयक्तिक स्पर्धेत तिने ही ऐतिहासिक कामगिरी केली. संपूर्ण अंतिम फेरीत एलावेनिल सुवर्णपदकाच्या शर्यतीत आघाडीवर धावत होती; मात्र अखेरच्या दोन शॉट्समध्ये निसटलेल्या गुणांमुळे तिला रौप्यपदकावर समाधान मानावे लागले. यजमान जपानच्या ताइचीने निर्णायक क्षणी मुसंडी मारत सुवर्णपदक पटकावले.
२५२.४ गुणांची कमाई; अखेरच्या दोन शॉट्समध्ये हुकले सुवर्ण!
२७ वर्षीय एलावेनिलने अंतिम फेरीत २५२.४ गुणांची भक्कम कमाई केली. एका टप्प्यावर तिचे सुवर्णपदक निश्चित मानले जात होते. मात्र, शेवटच्या दोन शॉट्समध्ये जपानी नेमबाज ताइचीने अधिक अचूक वेध घेत आघाडी घेतली आणि सुवर्णावर शिक्कामोर्तब केले. या स्पर्धेत भारताला नेमबाजीत मिळालेले हे दुसरे रौप्यपदक ठरले आहे. याआधी १० मीटर एअर रायफल सांघिक प्रकारातही भारताने रौप्यपदक जिंकले होते आणि त्या संघातही एलावेनिलचा वाटा अत्यंत मोलाचा होता.
कोण आहे एलावेनिल वलारिवन? जागतिक स्तरावर उमटवला ठसा!
DOUBLE SILVER FOR INDIA’S ELAVENIL 🇮🇳
– Wins Individual Silver Medal in the Women’s 10m Air Rifle event🥈
– Helped India to win the Team Silver Medal in Women’s 10m Air Rifle event🥈
WELL DONE GIRL! 🔥🔥🔥 pic.twitter.com/nHYiY39M7S
— The Khel India (@TheKhelIndia) September 20, 2026
नेमबाजीच्या विश्वात एलावेनिल हे एक अत्यंत नामांकित आणि प्रतिष्ठित नाव आहे. मूळची तमिळनाडूची असलेल्या या नेमबाजाने आंतरराष्ट्रीय स्तरावर भारताचा तिरंगा अनेकदा अभिमानाने फडकवला आहे. तिने कनिष्ठ आणि वरिष्ठ अशा दोन्ही गटांतील आंतरराष्ट्रीय स्पर्धांमध्ये सातत्याने अद्वितीय कामगिरी करत १० मीटर एअर रायफल प्रकारात भारताची मुख्य दावेदार म्हणून स्वतःला सिद्ध केले आहे.
ज्युनियर ते सीनियर सर्किट; पदकांची लयलूट करत जिंकले मन!
आयएसएसएफ (ISSF) ज्युनियर विश्वचषकात अनेक सुवर्णपदके जिंकून एलावेनिलने आंतरराष्ट्रीय स्तरावर ओळख मिळवली होती. त्यानंतर तिने सीनियर सर्किटमध्ये पदार्पण करत स्वतःचे स्थान अधिक पक्के केले. आशियाई स्पर्धेत दुहेरी पदके जिंकण्याआधी तिने जागतिक अजिंक्यपद, आशियाई अजिंक्यपद आणि विश्वचषक यांसारख्या सर्वोच्च क्रीडा मंचांवर भारताचे यशस्वी नेतृत्व करत पदकांची लयलूट केली आहे.
