Ashok Kharat Case : नाशिकमधील भोंदू बाबा अशोक खरात (Ashok Kharat Case) याच्याविरुद्ध दाखल झालेल्या सर्व १० गुन्ह्यांचा तपास आता विशेष तपास पथक करणार आहे. यामुळे प्रकरणाला नवी दिशा मिळाली असून, तपास यंत्रणांना वेग येण्याची शक्यता आहे. सर्व गुन्हे एकत्रित तपास अशोक खरात (Ashok Kharat Case) याच्यावर नाशिक पोलिसांत ८ गुन्हे दाखल आहेत. तर वावी पोलिस ठाण्यात त्याने दिनेश परब आणि राजेंद्र जासूद यांच्याविरुद्ध खंडणीचा गुन्हा दाखल केला होता. शिर्डी पोलिसांत त्याच्या ऑफिस बॉयविरुद्ध एक गुन्हा दाखल आहे. हे सर्व गुन्हे एकमेकांशी संबंधित असल्याने, सर्व प्रकरणांचा एकत्रित तपास एसआयटीच्या माध्यमातून करण्याचा निर्णय घेण्यात आला आहे. एसआयटी टीमने काल रात्री नाशिक क्राईम ब्रँचकडून डीव्हीआर, सीसीटीव्ही फुटेज, लॅपटॉप, कागदपत्रे यासह सर्व महत्त्वाचे मुद्देमाल ताब्यात घेतला आहे. आता या सर्व पुराव्यांचा सखोल अभ्यास करून एकत्रित तपास सुरू होणार आहे. Ashok Kharat Case १५० हून अधिक महिलांचे लैंगिक शोषण तपासादरम्यान अशोक खरातबाबत धक्कादायक खुलासे समोर येत आहेत. खरातने १५० हून अधिक महिलांचे लैंगिक शोषण केल्याचे समोर आले आहे. तो जोडप्यांना समोर बसवून पत्नीमुळे यशस्वी झाल्याचे पतीला सांगून महिलेच्या मनात सहानुभूती निर्माण करायचा. तसेच तो मोठ्या अधिकारी आणि उद्योगपतींसोबत मुलींचे संबंध जुळवून द्यायचा. यासाठी तो अंकशास्त्राचा आधार घेत असल्याचे भासवायचा. त्याच्या कार्यालयातील खास केबिनमध्ये महिलांचे लैंगिक शोषण होत असे. या केबिनच्या बाहेर असलेल्या झुंबरातील लाइट आतून बंद केल्यावर कोणालाही आत प्रवेश द्यायचा नाही, असा नियम होता. ही सांकेतिक भाषा त्याच्या कार्यालयातील कर्मचाऱ्यांना माहीत होती, असे चौकशीत उघड झाले आहे. बंदुकीचा परवाना आणि २१ काडतुसे जप्त अशोक खरातकडून जप्त करण्यात आलेल्या बंदुकीचा परवाना नाशिक जिल्हा प्रशासनानेच दिल्याचे उघड झाले आहे. १५ ऑक्टोबर २०१२ रोजी हा शस्त्र परवाना मंजूर झाला होता, तर १ जानेवारी २०२४ रोजी त्याचे नूतनीकरण करण्यात आले होते. त्याच्या फार्महाऊसवरून २१ काडतुसे जप्त करण्यात आल्या आहेत. त्यापैकी ५ काडतुसे वापरलेल्या आहेत. या काडतुसांचा नेमका वापर कशासाठी झाला, याचा तपास सुरू आहे. जिल्हाधिकाऱ्यांच्या परवानगीनंतरच हा परवाना देण्यात आला होता. आता बंदुकीचा परवाना रद्द करण्याची प्रक्रिया सुरू करण्यात आली आहे. शिवानिका संस्थांची बँक खाती सील अशोक खरातच्या (Ashok Kharat Case) शिवानिका संस्थांच्या सर्व बँक खात्यांवर सील लावण्यात आले आहे. विशेष तपास पथकाने (SIT) खरात आणि त्याच्या कुटुंबीयांच्या नावावर असलेल्या जमीन, घर, दुकाने यांची माहिती मागवली आहे. नोंदणी विभागाकडून राज्यभरातील मालमत्तेचा शोध घेतला जात आहे. कोट्यवधी रुपयांची आर्थिक माया उघड होण्याची शक्यता आहे. मालमत्ता खरेदीसाठी पैसा कुठून आला, याचा सखोल तपास केला जाणार आहे.