Helicopter Crash : पाकिस्तानमधून एक धक्कादायक दुर्घटनेची बातमी समोर आली आहे. पाकिस्तानी लष्कराचे एमआय-17 (Mi-17) हेलिकॉप्टर मुझफ्फराबादजवळ कोसळल्याची घटना घडली असून या भीषण अपघातात वैमानिकासह हेलिकॉप्टरमधील सर्व 20 जवानांचा मृत्यू झाल्याची माहिती समोर आली आहे. या घटनेमुळे पाकिस्तान लष्करात मोठी खळबळ उडाली आहे. (Helicopter Crash)

मिळालेल्या माहितीनुसार, हे हेलिकॉप्टर उड्डाण घेत असतानाच अचानक तांत्रिक बिघाड झाल्याने नियंत्रणाबाहेर गेले आणि काही क्षणांतच कोसळले. अपघातानंतर हेलिकॉप्टरला आग लागल्याचेही वृत्त आहे. दुर्घटनेनंतर बचाव पथकांनी तातडीने घटनास्थळी धाव घेत मदतकार्य सुरू केले. (Helicopter Crash)

स्थानिक माध्यमांच्या वृत्तानुसार, हा अपघात पाकव्याप्त काश्मीरमधील नीलम खोऱ्यात झाला. हेलिकॉप्टरमध्ये वैमानिकासह सुमारे 20 सैनिक प्रवास करत होते. अपघात इतका भीषण होता की त्यातील कोणीही बचावू शकले नाही. (Helicopter Crash)

पाकिस्तानी लष्कराने जारी केलेल्या प्राथमिक निवेदनात तांत्रिक बिघाडामुळे हेलिकॉप्टर कोसळल्याची शक्यता व्यक्त करण्यात आली आहे. मात्र, अपघातामागील नेमके कारण अद्याप स्पष्ट झालेले नाही. त्यामुळे तांत्रिक बिघाडासह इतर सर्व शक्यतांचा तपास सुरू करण्यात आला आहे. (Helicopter Crash)

घटनेची माहिती मिळताच स्थानिक प्रशासन, लष्करी अधिकारी आणि बचाव पथके घटनास्थळी दाखल झाली. हेलिकॉप्टरचा ढिगारा हटवण्याचे काम युद्धपातळीवर सुरू असून मृत जवानांची ओळख पटवण्याचे प्रयत्नही सुरू आहेत. अद्याप मृतांची नावे अधिकृतपणे जाहीर करण्यात आलेली नाहीत. (Helicopter Crash)

दरम्यान, या भीषण दुर्घटनेची चौकशी करण्यासाठी पाकिस्तान लष्कराने उच्चस्तरीय समिती स्थापन केली आहे. प्राथमिक अहवालात तांत्रिक बिघाडाचा उल्लेख असला तरी घातपात किंवा इतर कोणतेही कारण होते का, याचाही तपास केला जाणार असल्याचे सांगण्यात आले आहे. (Helicopter Crash)

विशेष म्हणजे, दोन दिवसांपूर्वीही बलुचिस्तानमध्ये पाकिस्तानी लष्कराचे एक हेलिकॉप्टर अपघातग्रस्त झाल्याची घटना घडली होती. सलग दोन दुर्घटनांमुळे पाकिस्तानच्या लष्करी विमान सुरक्षेबाबत प्रश्नचिन्ह निर्माण झाले आहे. (Helicopter Crash)