Pune | गेल्या काही दिवसांत मराठी अमराठी वाद होण्याच्या अनेक घटना राज्यात होताना दिसत आहेत. या वादाचे अनेक व्हिडिओ देखील सोशल मीडियावर व्हायरल झाले आहेत. आता पुण्यात इंग्रजी पाट्या लावण्यात आल्यावरुन वाद होण्याची शक्यता आहे. याविषयी महाराष्ट्र नवनिर्माण सेनेने लावण्यात आलेल्या इंग्रजी पाट्यांविरोधात आक्रमक भूमिका घेतली आहे. पुण्यातील लक्ष्मी रस्त्यावर या इंग्रजी पाट्या लावण्यात आलेल्या आहेत. या पाट्यांवर इंग्रजी भाषेत वाहतूक नियम सांगण्यात आल्याचा दावा मनसेच्या वतीने करण्यात आला आहे. पुण्यातील नुमवि शाळा परिसरात लक्ष्मी रस्त्यावर मोठ्या प्रमाणात इंग्रजी पाट्या लावण्यात आलेल्या आहेत. या पाट्यावरून मनसेने आक्रमक भूमिका घेतली असून “भारतात आहोत की इंग्लंडमध्ये”? असा प्रश्न वाहतूक पोलिसांना मनसेकडून विचारण्यात येत आहे. या इंग्रजी पाट्यांविरोधात मनसे आक्रमक झाली असून आंदोलनाचा इशारा दिला आहे. महाराष्ट्र नवनिर्माण सेना मराठी पाट्या लावण्यासाठी आग्रही आहे. मुंबई आणि राज्यातील अनेक ठिकाणी दुकानांवर मराठी पाट्या लावण्यात याव्यात यासाठी मनसैनिक रस्त्यावर उतरले होते. पुण्यातही जंगली महाराज रस्त्यावरील दुकानांवर असलेल्या इंग्रजी पाट्यांसंदर्भात मनसैनिकांनी खळखट्याक केला होता. आक्रमक पवित्रा घेतला आहे. आता लक्ष्मी रस्त्यावर लावण्यात आलेल्या वाहतूकीचे नियम सांगणाऱ्या इंग्रजी पाट्यांविरोधात आक्रमक झाले आहेत.
