बारामती : बारामती नगर परिषदेच्या निवडणुकीत प्रभाग क्रमांक २ मधून राष्ट्रवादी काँग्रेस समर्थित अनुप्रिता अक्षय डांगे यांचा एकमेव अर्ज उरल्याने त्यांच्या बिनविरोध निवडीचा मार्ग मोकळा झाला. या प्रभागातून कोणत्याही इतर पक्षाचा उमेदवार अर्ज दाखल न केल्याने अनुप्रिता डांगे यांची निवड बिनविरोध झाली. पहिल्यांदाच सरळ निवडणुकीच्या रिंगणात उतरलेल्या या महिला उमेदवाराच्या अनपेक्षित आणि सहज विजयामुळे अजित पवार समर्थकांमध्ये मोठा उत्साह आणि जल्लोषाचे वातावरण निर्माण झाले आहे. दरम्यान, बारामतीच्या इतर प्रभागांमध्ये निवडणूक चुरशीची होण्याची चिन्हे दिसत आहेत. भारतीय जनता पार्टी, बहुजन समाज पार्टी, तसेच राष्ट्रवादी शरद पवार पक्षाने वंचित बहुजन आघाडी, मनसे, काँग्रेस या पक्षांशी युती करून विविध प्रभागांत उमेदवार उतरवले आहेत. त्यामुळे बारामती नगरपरिषद निवडणूक अधिक रंगतदार होण्याची शक्यता व्यक्त केली जात आहे. बारामतीच्या राजकारणात अजित पवार यांचे समर्थन असलेल्या उमेदवाराचा बिनविरोध विजय ही सुरुवातीची आघाडी निवडणुकीच्या अंतिम निकालाचा सूर ठरवणारी ठरते का? याकडे सर्वांचे लक्ष लागले आहे.
