नवी दिल्ली : राष्ट्रीय स्वयंसेवक संघ आणि भारतीय जनता पार्टीने पुन्हा एकदा देशातल्या महत्वपूर्ण शहराचे नामांतर करण्याचा विचार सुरु केला आहे. भाजपकडून  हैदराबादच्या नामांतरणाचा मुद्दा उपस्थित  करत याच्या हालचाली सुरु केल्या आहेत. नामांतरणाचा मुद्दा लक्षात घेत संघाने जानेवारी महिन्यामध्ये तीन दिवसीय बैठक हैदराबादमध्ये आयोजित केली असल्याचे सांगण्यात येत आहे.

जानेवारीच्या पहिल्याच आठवड्यात होणाऱ्या या बैठकीचे आयोजन करण्यात आले आहे. संघाशी संबंधित संस्थानादेखील या बैठकीला आमंत्रित करण्यात आले आहे. पुढील वर्षी म्हणजेच २०२२ रोजी पाच राज्यांमध्ये होणाऱ्या निवडणुकांच्या तयारीसंदर्भातील चर्चा या बैठकीत केली जाणार असल्याचे सांगण्यात येत आहे. विशेष म्हणजे या बैठकीची माहिती देताना आयोजन हैदराबादऐवजी भाग्यानगरमध्ये करण्यात आल्याचे संघाने म्हटले आहे.

राष्ट्रीय स्वयंसेवक संघाच्या ट्विटर अकाऊंटवरुन करण्यात आलेल्या ट्विटमध्ये हैदराबादऐवजी भाग्यानगर असे शहराचं नाव लिहिण्यात आले आहे. “आरएसएसशी संबंधित वेगवेगळ्या संस्थांच्या प्रमुखांची समन्वय बैठक ५ ते ७ जानेवारी २०२२ दरम्यान भाग्यानगरमध्ये आयोजित करण्यात आलीय,” असे सुनील आंबेकर यांनी सांगितल्याचे  ट्विट आरएससच्या अकाऊंटवरुन करण्यात आले आहे.

आता केवळ हैदराबादच्या नामांतरणाची मागणी करण्याऐवजी संघाने थेट भाग्यानगर असा उल्लेख करत हे नाव वापरण्यास सुरुवात केल्याने या ट्विटची चांगलीच चर्चा आहे. मागील बऱ्याच काळापासून संघ आणि भाजपाकडून हैदराबादच्या नामांतरणाचा मुद्दा उपस्थित केला जातोय.

२०२० साली झालेल्या हैदराबाद महानगरपालिका निवडणुकीमध्ये उत्तर प्रदेशचे मुख्यमंत्री योगी आदित्यनाथ यांनी प्रचारादरम्यान फैजाबादचं नामांकरण करुन त्याला अयोध्या नाव दिलं जाऊ शकतं आणि अलाहाबादचं नाव प्रयागराज केलं जाऊ शकतं तर हैदराबादचंही नामांकरण करुन त्याला भाग्यानगर करता येईल, असे म्हटलेले.

“काही लोकांनी मला हैदराबादचे नामांकरण करुन त्याला भाग्यानगर करता येईल का असं विचारलं. त्यावर मी का नाही? नक्कीच! असे उत्तर दिले. उत्तर प्रदेशमध्ये भाजपा सत्तेत आल्यानंतर आम्ही फैजाबादचं अयोध्या केलं आणि अलहाबादचं प्रयागराज केलं. तर मग हैदराबादचं भाग्यानगर का करता येणार नाही?,” असे योगी म्हणाले होते.

“सरसंघचालक मोहन भागवत, भाजपाचे राष्ट्रीय अध्यक्ष जे. पी. नड्डा, पक्षाचे राष्ट्रीय सचीव बी. एल. संतोष आणि सहाय्यक सचीव शिव प्रकाश यांच्यासहीत अनेक वरिष्ठ पदाधिकारी या बैठकीला उपस्थित राहणार आहेत,” अशी माहिती सुत्रांनी दिली आहे.