मुंबई : मराठी सिनेसृष्टीमध्ये मागच्या काही वर्षांपासून बायोपिकची रांग लागली आहे. ठाण्याचा ‘‘ढाण्या वाघ’’ आनंद दिघे यांच्यानंतर आता महाराष्ट्रातील आणखी एक प्रसिद्ध राजकीय नेत्यावरील बायोपिक प्रेक्षकांच्या भेटीला येणार आहे. अभिनेता अनिकेत विश्वासराव हा या सिनेमात प्रमुख भूमिका साकारणार आहे.

‘या’ प्रसिद्ध राजकीय नेत्यावर येणार बायोपिक
वारकरी कुटुंबाची पार्श्वभूमी असलेल्या सर्वसामान्य कुटुंबात जन्माला येऊन सांगोला मतदारसंघाचे आमदार स्वर्गीय मा. गणपतराव देशमुख यांच्या आयुष्यावर नवा सिनेमा प्रेक्षकांच्या भेटीला येणार आहे. ‘‘कर्मयोगी आबासाहेब’’ असं सिनेमाचं नाव असून हा सिनेमा 25 ऑक्टोबरला रिलीज होणार आहे. हा सिनेमा मराठीसह हिंदी भाषेत रिलीज होणार आहे. अभिनेता अनिकेत विश्वासराव या सिनेमात गणपतराव देशमुख यांच्या प्रमुख भूमिकेत आहे.

सिनेमात ‘या’ कलाकारांनी साकारल्या महत्वाच्या भूमिका
या सिनेमात दमदार स्टारकास्ट आहे. अनिकेत विश्वासराव, हार्दिक जोशी, देविका दफ्तरदार, पृथ्विक प्रताप, विजय पाटकर, प्रदीप वेलणकर, सुरेश विश्वकर्मा, अरबाज शेख, तानाजी गलगुंडे, घनश्याम दरोडे (छोटा पुढारी), अहमद देशमुख, वृंदा बाळ, निकिता सुखदेव, अली शेख, अल्ताफ दादासाहेब शेख यांच्या प्रमुख भूमिका आहेत.

कोण आहेत गणपतराव देशमुख ?
गणपतराव देशमुख यांच्याबद्दल सांगायचं झाल्यास, सांगोला मतदारसंघातून ते तब्बल 11 वेळा आमदार म्हणून निवडून आले होते. तब्बल 55 वर्ष त्यांनी या मतदारसंघाचं प्रतिनिधित्व केलं. आबासाहेब यांनी राज्याच्या राजकारण, समाजकारणात महत्त्वाचं योगदान दिलं. दोन वेळा कॅबिनेट मंत्रीपद भूषवले आहे.