मुंबई : बिग बॉस मराठीचे यंदाचे पर्व मोठ्या प्रमाणात गाजत आहे. या शोने चॅनलला मोठ्या प्रमाणात TRP दिला आहे. या शोमधील स्पर्धकांना लोकांनी अक्षरशः डोक्यावर उचलून धरलं आहे. या शोमधून काही दिवसांपूर्वी बाहेर पडलेला छोटा पुढारी अशी ओळख असलेला घनश्याम दरवडे लवकरच एका राजकीय नेत्याच्या बायोपिकमध्ये झळकणार आहे. ‘या’ प्रसिद्ध राजकीय नेत्यावर येणार बायोपिक वारकरी कुटुंबाची पार्श्वभूमी असलेल्या सर्वसामान्य कुटुंबात जन्माला येऊन सांगोला मतदारसंघाचे आमदार स्वर्गीय मा. गणपतराव देशमुख यांच्या आयुष्यावर नवा सिनेमा प्रेक्षकांच्या भेटीला येणार आहे. ‘‘कर्मयोगी आबासाहेब’’ असं सिनेमाचं नाव असून हा सिनेमा 25 ऑक्टोबरला रिलीज होणार आहे. या सिनेमात दमदार स्टारकास्ट आहे. अनिकेत विश्वासराव, हार्दिक जोशी, देविका दफ्तरदार, पृथ्विक प्रताप, विजय पाटकर, प्रदीप वेलणकर, सुरेश विश्वकर्मा, अरबाज शेख, तानाजी गलगुंडे, घनश्याम दरोडे (छोटा पुढारी), अहमद देशमुख, वृंदा बाळ, निकिता सुखदेव, अली शेख, अल्ताफ दादासाहेब शेख यांच्या प्रमुख भूमिका आहेत. घनश्याम विषयी बोलायचे झाल्यास त्याला १० वर्षांपूर्वी त्याच्या राजकीय नेत्याप्रमाणे बोलण्याच्या शैलीमुळे मोठी प्रसिद्धी मिळाली. तेंव्हा तो केवळ १३ ते १४ वर्षांचा होता. त्याची मोठ्या नेत्यासारखं बोलण्याची क्लिप मोठ्या प्रमाणात व्हायरल झाली होती. तो अहमदनगरच्या श्रीगोंदा तालुक्यातील टाकळीचा हा रहिवासी आहे. या बायोपिकपासून त्याच्या सिनेसृष्टीतील प्रवासाला सुरुवात होणार आहे. कोण आहेत गणपतराव देशमुख ? गणपतराव देशमुख यांच्याबद्दल सांगायचं झाल्यास, सांगोला मतदारसंघातून ते तब्बल 11 वेळा आमदार म्हणून निवडून आले होते. तब्बल 55 वर्ष त्यांनी या मतदारसंघाचं प्रतिनिधित्व केलं. आबासाहेब यांनी राज्याच्या राजकारण, समाजकारणात महत्त्वाचं योगदान दिलं. दोन वेळा कॅबिनेट मंत्रीपद भूषवले आहे.
