सांगोला : शेतकरी कामगार पक्षाला (शेकाप) मोठा धक्का बसला असून, सांगोला तालुक्यात आज शेकापचे अनेक पदाधिकारी आणि कार्यकर्ते भाजपात सामील झाले. पालकमंत्री जयकुमार गोरे यांच्या उपस्थितीत हा सोहळा पार पडला. मात्र, भाजप प्रवेशाच्या मिरवणुकीदरम्यान एका माथेफिरुने स्वर्गीय गणपतराव देशमुख यांच्या घरावर दारूची बाटली फेकल्याची घटना घडली. यामुळे सांगोल्यात तणावाचे वातावरण निर्माण झाले आहे. संतप्त कार्यकर्त्यांनी या घटनेचा निषेध करत उद्या सांगोला बंदची हाक दिली आहे.

भाजपात शेकाप कार्यकर्त्यांचा मोठा प्रवेश

आमदार बाबासाहेब देशमुख यांचे निकटवर्तीय आणि शेकापचे नेते बाळासाहेब एरंडे, बाळासाहेब काटकर, संभाजी आलदर, सचिन देशमुख, राणी दिघे, उल्हास धायगुडे यांच्यासह शेकडो सरपंच, माजी सरपंच आणि विविध क्षेत्रातील मान्यवरांनी भाजपात प्रवेश केला.

सांगोला येथील छत्रपती शिवाजी महाराज चौकात आयोजित कार्यक्रमात पालकमंत्री जयकुमार गोरे, माजी खासदार रणजितसिंह निंबाळकर आणि भाजप जिल्हाध्यक्ष चेतन केदार यांच्या उपस्थितीत हा प्रवेश सोहळा साजरा झाला. या मिरवणुकीत सहभागी झालेल्या कार्यकर्त्यांनी उत्साहात घोषणा दिल्या, मात्र हा उत्साह लवकरच तणावात बदलला.

गणपतराव देशमुखांच्या घरावर हल्ला

मिरवणुकीदरम्यान एका व्यक्तीने स्वर्गीय गणपतराव देशमुख (भाई आबा साहेब) यांच्या घरासमोर दारूची बाटली फेकली. 11 वेळा सांगोला मतदारसंघातून आमदार म्हणून निवडून आलेल्या आणि शेकापचे संस्थापक नेते गणपतराव देशमुख यांचे हे घर सांगोला तालुक्यातील राजकीय वारसा मानले जाते. या घटनेमुळे शेकाप कार्यकर्ते संतप्त झाले असून, घरासमोर जमावबंदी करून त्यांनी जोरदार निषेध केला. गणपतराव देशमुखांच्या कुटुंबीय आणि समर्थकांनी या कृत्याला “अपमानजनक” आणि “राजकीय षड्यंत्र” म्हणून चित्रित केले आहे.

उद्या सांगोला बंद

या घटनेनंतर सांगोल्यातील वातावरण ढवळून निघाले आहे. संतप्त कार्यकर्त्यांनी पोलिस प्रशासनावर कारवाईचा दबाव टाकला असून, उद्या (11 ऑक्टोबर) संपूर्ण सांगोला बंदची घोषणा केली आहे. बंदीदरम्यान शेकाप समर्थक रस्त्यावर उतरून निषेध व्यक्त करणार आहेत. यामुळे सांगोला तालुक्यातील व्यापारी आणि सामान्य नागरिकांना अडचणींचा सामना करावा लागण्याची शक्यता आहे.