Andhra Dam – शहराच्या भविष्यातील पाणीपुरवठ्यासाठी महत्त्वाच्या ठरणाऱ्या आंध्रा धरण पाणी प्रकल्पाला मोठी चालना मिळाली आहे. प्रकल्पासाठी आवश्यक असलेल्या फिल्टर प्लँट आणि पाण्याच्या साठवण टाकीसाठी लागणारी सुमारे साडेतीन एकर जागा सोसायटी ऑफ सर्व्हंट ऑफ गॉड संस्थेने नगरपरिषदेला पत्राद्वारे उपलब्ध करून दिली आहे. या जागेची सरकारी मोजणी रविवारी (दि. २) नगराध्यक्ष संतोष दाभाडे पाटील आणि संस्थेच्या पदाधिकाऱ्यांच्या उपस्थितीत करण्यात आली.

सोमवारी झालेल्या मोजणीवेळी संस्थेचे सचिव लाला घनशानी, प्रभुलाल चोथानी, ॲड. सचिन नवले, नगरसेवक शिवाजी आगळे, निखिल भगत, सत्यम खांडगे, सूरज सातकर आदी उपस्थित होते. यावेळी नगराध्यक्ष संतोष दाभाडे पाटील यांनी सांगितले की, आमदार सुनील शेळके यांच्या विशेष प्रयत्नातून हा महत्त्वाकांक्षी प्रकल्प मार्गी लागत असून,

शहराच्या वाढत्या लोकसंख्येला शुद्ध आणि मुबलक पाणीपुरवठा करण्यासाठी तो अत्यंत उपयुक्त ठरणार असल्याचेही त्यांनी सांगितले. प्रकल्पासाठी आवश्यक जागा उपलब्ध करून घेण्यासाठी नगराध्यक्ष संतोष दाभाडे पाटील, नगरसेवक इंद्रकुमार ओसवाल, चिराग खांडगे, निखिल भगत, सत्यम खांडगे आणि ॲड. सचिन नवले यांनी प्रयत्न केल्याचे यावेळी सांगण्यात आले.

या योजनेअंतर्गत आंध्रा धरणातून तळेगाव शहरासाठी दरवर्षी ५.०९४ दशलक्ष घनमीटर पाण्याचे आरक्षण करण्यात आले आहे. दररोज २२ दशलक्ष लिटर पाण्याचा उपसा केला जाणार असून, १५ लाख लिटर क्षमतेची पाण्याची साठवण टाकी आणि २० दशलक्ष लिटर क्षमतेचा अत्याधुनिक फिल्टर प्लँट उभारण्यात येणार आहे. या प्रकल्पामुळे शहरातील पाणीटंचाई मोठ्या प्रमाणात कमी होऊन नागरिकांना नियमित, स्वच्छ आणि मुबलक पाणीपुरवठा उपलब्ध होईल. शहराच्या दीर्घकालीन पाणी नियोजनासाठी हा प्रकल्प महत्त्वाचा ठरणार असल्याचे उपस्थितांनी नमूद केले.