नीरा, – नीरा (ता. पुरंदर) येथे नीरा नदीच्या कडेला एक अनोखी मृतदेह आढळून आला. या मृतदेहाची ओळख मिळून आली नाही. त्यामुळे या मयताची ओळख पटवण्यासाठी कोणाच्या घरातील व्यक्ती बेपत्ता असल्यास जेजुरी पोलिसांशी संपर्क करण्याचे आवाहन जेजुरी पोलिसांच्या वतीने करण्यात आले आहे.

याबाबत पोलिसांनी दिलेल्या माहितीनुसार, (दि. २६) रोजी नीरा येथील वॉर्ड नंबर ६ मधील स्मशानभूमीच्या बाजूला नीरा नदी काठावर एका अनोळखी पुरुषाचा मृतदेह असल्याची माहिती पोलिसांना मिळाली. यानुसार पोलिसांनी खात्री केली असता त्या ठिकाणी साधारण ४५ ते ५५ वयोगटातील पुरुषाचा मृतदेह आढळून आला.

त्याने अंगात जांभळा व काळा पट्टा असलेला फुल बह्याचा टीशर्ट व खाकी पॅट असा पोशाख परिधान केला आहे. हृदयविकाराच्या तीव्र झटक्याने त्याचा मृत्यू झाला असावा, असा अंदाज वर्तवण्यात आला आहे. याबाबतची खबर पोलीस पाटील राजेंद्र भास्कर यांनी पोलिसांत दिली आहे. तपास पोलीस हवालदार घनःश्याम चव्हाण करीत आहेत.