Amol Nalawade – जिल्हा परिषद पुणे कृषी व पशुसंवर्धन दुग्ध समितीचे सभापती अमोल नलावडे यांनी मंगळवारी (दि. 26) खेड तालुक्याचा दौरा करून विविध विभागांच्या कामकाजाचा सविस्तर आढावा घेतला. या दौर्‍यात कृषी, पशुसंवर्धन, आरोग्य, शिक्षण व बांधकाम विभागाच्या विविध योजनांची प्रत्यक्ष पाहणी करण्यात आली.

दौर्‍यादरम्यान त्यांनी डॉ. बाबासाहेब आंबेडकर कृषी स्वावलंबन योजनेअंतर्गत कमान येथील लाभार्थी मीना शंकर भवार यांच्या नवीन विहिरीच्या बांधकामास भेट दिली. यावेळी कृषी विभागाच्या कामकाजाबद्दल समाधान व्यक्त करत डॉ. बाबासाहेब आंबेडकर कृषी स्वावलंबन योजना तसेच बिरसा मुंडा कृषी क्रांती योजनेचा अधिकाधिक लाभ पात्र शेतकर्‍यांना मिळावा, यासाठी पुढील वर्षात मोठ्या प्रमाणावर प्रस्ताव पाठवण्याच्या सूचना त्यांनी कृषी विभागाला दिल्या.

तसेच जिल्हा परिषद व पंचायत समिती सदस्यांनी या योजनांची माहिती लाभार्थ्यांपर्यंत पोहोचवावी, असे आवाहनही त्यांनी केले. यानंतर ग्रामपंचायत बुरसेवाडी व ग्रामपंचायत वाडा येथील पशुसंवर्धन विभागाच्या दवाखान्यांना भेट देत त्यांनी कामकाजाचा सविस्तर आढावा घेतला. अनेक वर्षांपासून वापरात असलेल्या इमारतींच्या दुरुस्तीसाठी प्रस्ताव सादर करावेत तसेच नवीन पशुसंवर्धन दवाखान्यांची आवश्यकता असलेल्या ग्रामपंचायतींनी जुन्या इमारतींचे निर्लेखन प्रस्ताव तातडीने जिल्हा परिषदेकडे सादर करावेत,

अशा सूचना त्यांनी संबंधित अधिकार्‍यांना दिल्या. ग्रामपंचायत वाडा येथील प्राथमिक आरोग्य केंद्रालाही त्यांनी भेट दिली. यावेळी उपस्थित आरोग्य कर्मचार्‍यांशी चर्चा करून दवाखान्याची ओपीडी वाढविणे तसेच वाडा दवाखान्यातील प्रसूती संख्या अधिक वाढविण्यासाठी विशेष लक्ष देण्याच्या सूचना त्यांनी केल्या. तसेच वाडा येथील समूह शाळेला भेट देऊन शाळा बांधकामाची पाहणी केली.

मुख्याध्यापकांकडून शाळेच्या आवश्यक गरजांची माहिती घेत बांधकाम विभागाचे उपअभियंता जयंत कचरे यांना आवश्यक कामांचे सविस्तर अंदाजपत्रक तयार करून तातडीने जिल्हा परिषदेकडे प्रस्ताव सादर करण्याच्या सूचना देण्यात आल्या. या दौर्‍यावेळी गटविकास अधिकारी विशाल शिंदे, विस्तार अधिकारी नानासाहेब मुसळे, विजय खेडकर, शिवप्रसाद वांगस्कर, सुभाष भोगटे, जितेंद्र शिंदे यांच्यासह विविध विभागांचे अधिकारी उपस्थित होते.