Amol Kolhe : राज्यात आगामी लोकसभा निवडणुकीच्या पार्श्वभूमीवर प्रत्येक पक्ष आपापल्या परीने प्रयत्न करताना दिसून येत आहे. त्यातच राज्याचे उपमुख्यमंत्री अजित पवार यांनी शिरूर लोकसभा मतदारसंघावर हक्क दाखवून याठिकाणावरून आपला उमेदवार निवडून आणणार असल्याचा शड्डू ठोकला आहे. त्यांच्या या निर्धारावर शरद पवार गटाचे खासदार अमोल कोल्हे यांनी अजित पवारांना आव्हान दिले आहे.

राष्ट्रवादी काँग्रेस पक्षाचे सर्वेसर्वा शरद पवार यांची पुण्यातील शिवाजीनगर येथील मोदी बागेतील निवासस्थानी खासदार अमोल कोल्हे यांनी भेट घेतली. खासदार अमोल कोल्हेंच्या शेतकरी आक्रोश मोर्चाला शिवनेरीपासून सुरुवात होत आहे. यावेळी त्यांनी “या मोर्चात आम्ही ६ मुद्दे घेऊन यात्रा काढत आहोत. अजित पवार यांनी काल केलेल्या विधानावर मी माझी भूमिका कालच मांडली आहे. तसेच आम्ही ६ महिन्यांपूर्वी हडपसर येथील विकासकामांची पाहणी केली होती”, असे अमोल कोल्हे यांनी सांगितले आहे.

अजित पवारांनी केलेल्या टीकेविषयी बोलताना अमोल कोल्हे यांनी,“मी सामान्य कुटुंबातील असून त्यांना (अजित पवारांना) काउंटर करणे मला योग्य वाटत नाही. माझ्या विजयात प्रत्येक कार्यकर्त्याचा वाटा होता. त्यांनी भूमिका का बदलली, मला माहित नाही. मी आहे त्याच ठिकाणी आहे. खासगीतील चर्चा सार्वजनिक करणं योग्य नाही. दादांचा एवढा दरारा आहे तर त्यांनी केंद्र सरकारला बोलावं आणि कांदा निर्यात बंदी उठवावी”, असा टोला देखील अमोल कोल्हे यांनी अजित पवारांना लगावला आहे.

पुढे अमोल कोल्हे यांनी, “तत्वांबरोबर राहणं योग्य आहे. मी माझ्या पक्षासोबत आहे. मी कुठे गेलो आहे? आमदारांनी कोण कोणत्या कारणांमुळे भूमिका बदलली, हे येणाऱ्या भविष्यात समजेल. माझा ना कारखाना आहे, ना कंपन्या आहेत, ना माझ्यावर चौकशी आहे. दादांनी काल एका चित्रपटाचं उल्लेख केला. त्या चित्रपटातील संवादाबाबत बोलायचे झाल्यास, शिवाजी महाराजांना दख्खनची सुभेदारी द्यावी असे दिल्लीपतीच्या मनात होते. दख्खनची सुभेदारी ही स्वराज्याच्या कैक पट होती, मात्र तेव्हा सुभेदारी स्वीकारली नाही आणि तत्वांशी महाराजांनी तडजोड केली नाही”, असे म्हणत ते शरद पवार गटाशी एकनिष्ठ असल्याचे अमोल कोल्हे यांनी पुन्हा एकदा स्पष्ट केले.