नवी दिल्ली : तत्कालीन सलवा जुडूम विषयक निकालावरून केंद्रीय गृहमंत्री अमित शहा यांनी विरोधी पक्षांचे उपराष्ट्रपतीपदाचे उमेदवार सुदर्शन रेड्डी यांच्यावर नक्षलवादाला पाठिंबा देण्याचा आरोप केला होता. त्याला सुदर्शन रेड्डी यांनी उत्तर दिले असून प्रत्येक नागरिकाचे जीवन, स्वातंत्र्य आणि मालमत्तेचे रक्षण करणे हे त्यांचे कर्तव्य आहे असे रेड्डी यांनी म्हटले आहे.

रेड्डी म्हणाले, मी या मुद्द्यावर भारताच्या माननीय गृहमंत्र्यांशी थेट संवाद साधू इच्छित नाही. वैचारिक मतभेद असूनही, प्रत्येक नागरिकाचे जीवन, स्वातंत्र्य आणि मालमत्तेचे रक्षण करणे हे त्यांचे संवैधानिक कर्तव्य आहे. दुसरे म्हणजे, मी निकाल लिहिला आहे. हा निर्णय माझा नाही, हा निर्णय सर्वोच्च न्यायालयाचा आहे. अमित शहा यांनी तो ४० पानांचा निकाल वाचावा अशी त्यांची इच्छा आहे. जर त्यांनी निकाल वाचला असता तर कदाचित त्यांनी ही टिप्पणी केली नसती. मी एवढेच सांगू इच्छितो आणि हा विषय येथेच संपवू इच्छितो. चर्चेत शालीनता असली पाहिजे.

अमित शहांनी रेड्डींवर हल्ला चढवत म्हटले होते की, विरोधी पक्षाचे उमेदवार सुदर्शन रेड्डी हे तेच व्यक्ती आहेत ज्यांनी डाव्या विचारसरणीच्या अतिरेकीवादाला मदत करण्यासाठी सलवा जुडूमचा निकाल दिला होता आणि जर हा निकाल दिला नसता तर डाव्या विचारसरणीचा नक्षलवाद २०२० पर्यंत संपला असता. हे तेच गृहस्थ आहेत ज्यांनी विचारसरणीने प्रेरित होऊन सलवा जुडूमचा निकाल दिला. ते पुढे म्हणाले, काँग्रेस पक्ष डाव्या पक्षांच्या दबावाखाली नक्षलवादाला पाठिंबा देणाऱ्या आणि सर्वोच्च न्यायालयासारख्या पवित्र व्यासपीठाचा वापर करणाऱ्या उमेदवाराला उभे करत आहे.