Amit Shah: स्वतंत्र सहकार मंत्रालयामुळे सहकार क्षेत्राला नवसंजीवनी; केंद्रीय गृहमंत्री अमित शहा यांचे प्रतिपादन
Amit Shah : नॅशनल हेवीच्या पुनर्निर्माणाचे भूमिपूजन, भारत टॅक्सी ॲपचा प्रारंभ

तळेगाव दाभाडे – स्वातंत्र्यानंतरच्या सुमारे ७० वर्षांच्या काळात केंद्रीय मंत्रिमंडळात स्वतंत्र सहकार खाते नव्हते. मात्र, पंतप्रधान नरेंद्र मोदी यांच्या सरकारने स्वतंत्र सहकार मंत्रालय स्थापन करून सहकार क्षेत्राला नवसंजीवनी देण्याचे काम केले, असे प्रतिपादन केंद्रीय गृह आणि सहकार मंत्री अमित शहा यांनी केले.
तळेगाव दाभाडे येथे नॅशनल हेवी इंजिनिअरिंग कंपनीच्या पुनर्निर्माणाचे भूमिपूजन आणि भारत टॅक्सी ॲपचा प्रारंभ केल्यानंतर आयोजित कार्यक्रमात ते बोलत होते.
यावेळी उपमुख्यमंत्री एकनाथ शिंदे, उपमुख्यमंत्री सुनेत्रा पवार, केंद्रीय हवाई वाहतूक व सहकार राज्यमंत्री मुरलीधर मोहोळ, उच्च व तंत्रशिक्षण मंत्री चंद्रकांत पाटील, न्याय व सामाजिक न्याय राज्यमंत्री माधुरी मिसाळ, सहकार मंत्री काकासाहेब पाटील, भाजपचे प्रदेशाध्यक्ष रवींद्र चव्हाण, नॅशनल हेवीचे संचालक संतोष बनकर, आशिष भुताने, पंकज कुमार बन्सल आदी मान्यवर उपस्थित होते.
कार्यक्रमाच्या सुरुवातीला भारत टॅक्सी ॲपचा झेंडा दाखवून प्रारंभ करण्यात आला. त्यानंतर अमित शहा यांच्या हस्ते नॅशनल हेवी इंजिनिअरिंग कंपनीच्या पुनर्निर्माणाचे भूमिपूजन करण्यात आले. एक पेड माँ के नाम या उपक्रमांतर्गत वृक्षारोपणही करण्यात आले. दीपप्रज्वलनानंतर मान्यवरांनी छत्रपती शिवाजी महाराज यांच्या पुतळ्यास पुष्पहार अर्पण करून अभिवादन केले.
स्वागतपर भाषणात केंद्रीय राज्यमंत्री मुरलीधर मोहोळ यांनी सहकार क्षेत्राच्या दृष्टीने हा प्रकल्प महत्त्वाचा असल्याचे मत व्यक्त केले. उपमुख्यमंत्री सुनेत्रा पवार म्हणाल्या की, या प्रकल्पामुळे पश्चिम महाराष्ट्रातील सहकार क्षेत्राला मोठे सहकार्य लाभेल. यामुळे स्वर्गीय अजितदादा पवार यांचे स्वप्न पूर्ण होण्यास मदत होईल.
भारत टॅक्सी वाहतूक सेवेच्या प्रारंभामुळे ३२ हजार सारथींना या सेवेचा लाभ मिळेल, असेही त्यांनी सांगितले. उपमुख्यमंत्री एकनाथ शिंदे म्हणाले की, तळेगावची भूमी औद्योगिक विकासासाठी ऊर्जा आणि चेतना देणारी आहे. साखर उद्योगाचे दहा हजार कोटी रुपये केंद्र सरकारने माफ केल्याचेही त्यांनी नमूद केले. केंद्रीय गृहमंत्री अमित शहा यांच्या नेतृत्वाखाली नक्षलवाद संपविण्याच्या दिशेने काम सुरू असल्याचेही ते म्हणाले.
यानंतर कार्यक्रमात संवाद साधताना अमित शहा यांनी विरोधी पक्षावर टीका केली. तसेच स्वतंत्र सहकार मंत्रालयाच्या माध्यमातून केंद्र सरकारने केलेल्या कामांचा आढावा घेतला. भारतात सहकार चळवळीची सुरुवात करणारे महाराष्ट्र हे पहिले राज्य असून, या राज्यात सहकाराची गंगोत्री वाहत असल्याचे त्यांनी सांगितले.
नॅशनल हेवी इंजिनिअरिंग कंपनीच्या पुनर्निर्माणाबाबत बोलताना शहा यांनी महत्त्वाची माहिती दिली. नव्याने उभारण्यात येणाऱ्या कंपनीत साखर कारखान्यांसाठी लागणारी यंत्रसामग्री तसेच दुग्धोत्पादन क्षेत्रासाठी आवश्यक अत्याधुनिक यंत्रसामग्री तयार केली जाणार आहे. हा प्रकल्प डिसेंबर २०२७ पर्यंत कार्यान्वित होईल, असा विश्वास त्यांनी व्यक्त केला.
केंद्रीय राज्यमंत्री मुरलीधर मोहोळ यांनी कार्यक्रमाचे स्वागत केले. काशीकर यांनी सूत्रसंचालन केले, तर पवन कुमार बन्सल यांनी आभार मानले. यावेळी तळेगाव दाभाडे नगर परिषदेचे नगराध्यक्ष संतोष दाभाडे पाटील, माजी मंत्री संजय भेगडे, प्रदेश किसान मोर्चाचे अध्यक्ष गणेश भेगडे आणि समन्वयक शांताराम कदम यांनी तळेगावकरांच्या वतीने केंद्रीय गृहमंत्री अमित शहा यांचा विशेष सत्कार केला.
Green Bridge: आंतरराष्ट्रीय हवामान परिषदेत ‘हरित सेतू’ प्रकल्पाचे कौतुक!





