Alephata Bus Stand – आळेफाटा (ता. जुन्नर) येथील एसटी बसस्थानक हे प्रवाशांसाठी सार्वजनिक वाहतुकीचे केंद्र आहे की, खासगी प्रवासी वाहतूक करणाऱ्या वाहनांसाठीचे वाहनतळ आहे, असा सवाल आता उपस्थित होऊ लागला आहे. याबाबत महाराष्ट्र राज्य मार्ग परिवहन महामंडळाच्या नारायणगाव आगाराने थेट ग्रामीण पोलीस अधीक्षक, पुणे यांच्याकडे लेखी तक्रार करीत बसस्थानक परिसरात सुरू असलेल्या बेकायदेशीर खासगी प्रवासी वाहतुकीबाबत गंभीर आक्षेप नोंदवला आहे.

आगार प्रशासनाच्या म्हणण्यानुसार, आळेफाटा बसस्थानकाच्या आवारात अनेक खासगी वाहने सर्रासपणे पार्क करून संगमनेर, कल्याण, नारायणगाव, नाशिक आणि अहिल्यानगर मार्गावर प्रवासी वाहतूक केली जाते. त्यामुळे एसटी बसेसच्या ये-जा मार्गात अडथळे निर्माण होत असून अपघाताचा धोका वाढला असल्याचे पत्रात नमूद आहे.

राज्य परिवहन विभागाच्या कर्मचाऱ्यांनी संबंधित वाहनांना अटकाव करण्याचा प्रयत्न केला असता त्यांना दादागिरी, दमदाटी आणि शिवीगाळ सहन करावी लागत असल्याचाही आरोप करण्यात आला आहे. यामुळे एसटी कर्मचाऱ्यांमध्ये भीतीचे वातावरण निर्माण झाले आहे. दिनांक २१ मे २०२६ रोजी करण्यात आलेल्या पाहणीत काही वाहनांवर बेकायदेशीर प्रवासी वाहतुकीचे आरोप करण्यात आले असून त्यामध्ये इको कार, मॅक्सिमो, टेम्पो ट्रॅव्हलर आणि एर्टिगा सारख्या वाहनांचा समावेश आहे.

सामान्य प्रवाशांनाही होतोय त्रास
बसस्थानक परिसरात खासगी वाहनांची वाढती गर्दी, अनधिकृत प्रवासी उचल, पार्किंगचा गोंधळ आणि वाहतूक कोंडी यामुळे सामान्य प्रवाशांना मोठा त्रास सहन करावा लागत आहे. विशेषतः एसटी बसेसना वळण घेताना अडचणी येत असल्याने एखादी गंभीर दुर्घटना घडण्याची भीती व्यक्त होत आहे. दरम्यान, आळेफाटा व बेल्हे वाहतूक नियंत्रण कक्षाचे पत्र मिळाले असून आळेफाटा व बेल्हे बसस्थानक आवारात अनेक खासगी वाहने प्रवाशी वाहतूक करण्यासाठी उभी असतात, त्यांच्या विषयी तक्रार प्राप्त झाली आहे. त्यांच्यावर कारवाई करणार असल्याचे पोलीस निरीक्षक विश्वास जाधव यांनी सांगितले.