Alandi News – परवानगी न घेता बांधकाम करणाऱ्यांना आळंदी नगरपरिषद एक स्पष्ट आणि कठोर संदेश दिला आहे. नगरपरिषद हद्दीतील भागीरथी नाल्याच्या परिसरात अनधिकृतरीत्या शौचालय व बाथरूमचे बांधकाम सुरू असल्याचे निदर्शनास येताच बांधकाम विभागाच्या पथकाने तातडीने कारवाई केली. जेसीबी मशिनच्या साहाय्याने हे संपूर्ण बांधकाम जमीनदोस्त करण्यात आले असून, बेकायदा बांधकाम करणाऱ्यांसाठी हा एक मोठा धडा मानला जात आहे. मिळालेल्या माहितीनुसार, भागीरथी नाल्यालगत नगरपरिषदेची कोणतीही पूर्वपरवानगी न घेता हे बांधकाम सुरू होते. हे बांधकाम केवळ अनधिकृतच नव्हते, तर त्यामुळे रस्त्यावरून चालणाऱ्या नागरिकांना आणि रहदारीलाही अडथळा निर्माण होणार होता. बांधकाम विभागाला याची माहिती मिळताच अधिकाऱ्यांनी घटनास्थळी धाव घेतली, सुरू असलेले काम तात्काळ थांबवले आणि ते पाडून टाकले. नगरपरिषद प्रशासन आता अशा प्रकरणांमध्ये कोणतीही दिरंगाई न करता तातडीने कारवाई करत असल्याचे यावरून स्पष्ट झाले आहे. कायद्याने बंदी असताना धाडस कशासाठी? नाले, सार्वजनिक जागा आणि नगरपरिषदेच्या मालकीच्या कोणत्याही जागेवर परवानगीशिवाय बांधकाम करणे हे कायद्याने पूर्णपणे निषिद्ध आहे. असे असतानाही काही नागरिक नगरपरिषदेला न जुमानता बेकायदा बांधकामे उभारत असतात. मात्र, आता अशा बांधकामावर झालेला खर्च वाया जाण्याची वेळ येऊ नये म्हणून प्रत्येक नागरिकाने आधी रीतसर परवानगी घेणे आणि नंतरच बांधकाम करणे हेच शहाणपणाचे ठरेल. परवानगी न घेता बांधकाम करणाऱ्यांसाठी मोठा इशारा ही कारवाई केवळ एका बांधकामापुरती मर्यादित नसून, नगरपरिषद प्रशासनाने स्पष्ट केले आहे की, हद्दीतील सर्व अनधिकृत बांधकामांवर यापुढे नियमित धडक मोहीम राबवली जाईल. ज्या नागरिकांनी परवानगीशिवाय बांधकाम केले आहे किंवा जे तसा विचार करत आहेत, त्यांनी वेळीच सावध होणे आवश्यक आहे. अन्यथा आर्थिक नुकसानीसोबतच कठोर कायदेशीर कारवाईलाही सामोरे जावे लागेल, हे या प्रकरणाने अधोरेखित केले आहे. “सदर बांधकाम हे नगरपरिषदेच्या पूर्वपरवानगीशिवाय नियमबाह्यरीत्या सुरू होते. यामुळे रस्त्यावर रहदारीला अडथळा निर्माण होणार होता. नगरपरिषद हद्दीतील नागरिकांनी बांधकाम परवानगी घेऊनच बांधकाम करावे. अनधिकृत बांधकामांवर यापुढे आणखी कठोर कारवाई सुरू राहणार आहे.” – मनिष गायकवाड, बांधकाम विभाग नगर अभियंता, आळंदी नगरपरिषद.
