Al Qaeda Threat: अल-कायदाच्या समर्थकांकडून अमेरिकन आणि इस्रायली विमानांवर हल्ले करण्याचं आवाहन करण्यात आल्याची धक्कादायक माहिती समोर आली आहे.

9/11 दहशतवादी हल्ल्याचा संदर्भ देतानाच, फ्लाय दुबईच्या FZ1073 विमानाचं कथित अपहरण करण्याचा प्रयत्न करणाऱ्या सहवैमानिकाचाही उल्लेख करण्यात आला आहे. या प्रकरणामुळे दहशतवादी संघटनांच्या ऑनलाइन प्रचाराबाबत चिंता वाढली आहे.

न्यूयॉर्क पोस्टच्या वृत्तानुसार, अल-कायदाच्या समर्थकांकडून प्रकाशित होणाऱ्या ‘अल-बयान’ या साप्ताहिकाच्या ताज्या अंकात विमानांवर हल्ल्याचं आवाहन करण्यात आलं. या लेखात 11 सप्टेंबर 2001 रोजी झालेल्या 9/11 हल्ल्याचा आणि 30 सप्टेंबर रोजी फ्लाय दुबईच्या FZ1073 विमानाशी संबंधित घटनेचा संदर्भ देण्यात आला.

‘युद्ध अजून संपलेलं नाही’, असा दावा करत अमेरिकन, इस्रायली आणि त्यांच्या समर्थकांना घेऊन जाणाऱ्या विमानांना लक्ष्य करण्याची धमकी या लेखातून देण्यात आल्याचं वृत्त आहे. लेखासोबत 9/11 हल्ल्यातील ट्विन टॉवर्स आणि फ्लाय दुबईच्या घटनेशी संबंधित छायाचित्रांचाही वापर करण्यात आला.

या मजकुराचा प्रसार अल-कायदाशी संबंधित टेलिग्राम चॅनेलवर करण्यात आला होता. मात्र, त्यानंतर तो हटवण्यात आल्याचं सांगण्यात येत आहे. दहशतवादविरोधी तज्ज्ञ इव्हान कोलमन यांच्या मते, अल-कायदा समर्थक या घटनेचा प्रचारासाठी वापर करत आहेत.

दरम्यान, कथित सहवैमानिक हमाम अल-हम्मामीच्या सोशल मीडिया अकाउंटशी संबंधित काही सामग्री समोर आल्यानंतर या प्रकरणाला नवा पैलू मिळाला आहे. त्याच्या अकाउंटवर अल-कायदाच्या एका प्रमुख नेत्याचे फोटो शेअर करण्यात आल्याचंही वृत्त आहे. या प्रकरणाचा तपास सुरू असून, संबंधित व्यक्तीचा नेमका दहशतवादी संघटनेशी संबंध काय होता, हे अद्याप स्पष्ट झालेले नाही.